” Gobierno lo sigui sostene cada un di boso den e lucha aki”.
ORANJESTAD – Riba 19 di Maart ta dia Mundial di Trabou Social y ta un dia na unda ta para keto na tur e trabounan cu ta wordo haci riba e veld social. Riba e dia special aki, Minister di Asuntonan Social Rocco Tjon, a organisa un evento pa trece tur trahado social hunto pa duna nan atencion special den un sesion di relaha y dominio pa asina por tuma decisionnan miho. E tema di e aña aki ta “Buen Vivir”, cu ta un concepto conoci entre esnan cu ta den e veld social. “Buen Vivir’ ta duna e hermentnan necesario, y ta inspira esnan den e veld pa realisa cu pa cada reto, tin un solucion.
E trahadonan social tambe a haya un presentacion di señora Milly Lacle riba e tema di con pa nan relaha nan mes, bahando e stress di tur dia y hayando e pas cu nan mester. Un presentacion sigur hopi intersante cu a cay na un bon momento pa cada un di nan.
Prome Minister Evelyn Wever-Croes tabata presente na e ocacion special aki, na unda e tabata tin e oportunidad di comparti un rato cu esnan cu ta labora den e veld social. Prome Minister a expresa di ta sumamente honra di por a celebra un rato e dia importante aki cu nan mirando cu trabou social ta uno noble y ta exigi hopi pasenshi y dedicacion, y e mandatario tin hopi respet pa esnan cu ta haci e trabou aki.
“Como Prome Minister di pais Aruba, mirando e problematica grandi cu tin den sociedad pa loke ta abuso sexual di nos muchanan, mi a pidi nan pa yuda nos. E topico aki sigur tin nos atencion desde inicio di gobernacion. Gobierno a purba bringa e problematica aki, cambiando leynan, introduciendo castigo mas severo, a bin cu ley cu no ta caduca nunca, a bin cu Codigo di Proteccion, “Signs of Safety, y a traha e Family Justice Center. E inversion den e cartera social tabata uno grandi, pa asina purba di tur manera baha e porcentahe di casonan di abuso sexual contra muchanan, dunando nan e proteccion cu nan merece.
Ta importante si pa remarca cu na momento cu e estudio a sali indicando cu mayoria di casonan na Aruba, ta wordo cometi pa esnan cu ta cerca di e mucha, manera famia, amistadnan, tanta, omo etc., ta haci e proceso pa bringa esaki uno mas dificil. Pa e motibo aki mi a pidi e trahadonan social, pa sigui yuda nos busca maneranan pa proteha nos muchanan contra abuso sexual”, Prome Minister a enfatisa.
Prome Minister a expresa cu e tabata un atardi ameno, na unda cu por a wak cu e trahadonan social a wordo trata bon, y cu nan a disfruta hopi di e atardi aki bon mereci. E trabou aki no ta uno facil, pero na Aruba nos trahadonan social ta traha cu nan alma y curason pa yuda tur esnan den necesidad, specialmente nos muchanan cu ta depende di nos pa proteha nan. E trahadonan aki a sa di demostra cu nan ta capas y cu nan tin e pasion pa haci e trabou debidamente.
“Den nomber di Gobierno di Aruba, mi ta gradici cada un di nan pa nan dedicacion na yuda esnan cu mas tin mester, specialmente nos muchanan. E respet pa cada un di boso ta grandi, pasobra ni con hopi reto tin den boso caminda, boso a sa di demostra cu boso ta sigui duna tur loke boso tin, y traha duro, surpasando cada obstaculo. Mi kier a bisa cada un di boso danki pa tur boso esfuerso, y sa cu Gobierno lo sigui sostene cada un di boso den e lucha aki”, Prome Minister a expresa.