Home » Casonan sospechoso di Dengue ta subiendo na Aruba

Casonan sospechoso di Dengue ta subiendo na Aruba

Ta pidi comunidad pa tuma medida necesario pa stop transmision di Dengue

by Admin
0 comment 163 views

 

ARUBA- 22 03 2024. Seccion di Epidemiologia y Investigacion di Departamento di Salud Publico ta informa cu nan ta mirando un aumento leve den casonan sospechoso di Dengue na Aruba, esaki basa riba dato nan ricibi for di un sistema di vigilancia nobo cu ta monitor sintomanan cu dokter nan di cas ta raporta y resultadonan di laboratorio tambe ta confirmando casonan positivo. Den region tambe esaki ta tumando lugar caminda diferente pais ta registrando aumento di caso nan sospechoso di Dengue. Apesar cu e temporada ta seco sin mucho yobida, seccion di GKMB tambe ta informa cu nan ta hayando criaderonan di sangura rond di cas particularmente cerca ciudadanonan cu ta colecta awa pa planta of muha mata. E containernan cu mas ta ser encontra cu criadero di sangura ta hemchi y bari cu awa.

Pa por stop e transmision di e virus di Dengue mester reduci of stop e sangura di sigui broei. Esaki nos por haci door di:
Tira afo of warda tur obheto cu por retene awa paden y rond di cas, scol, trabou y alrededor dibo. Por ehempel scoter bou mata, taira, coy hunga pafo, vas cu mata of flor y mas;
Tapa tur awa colecta den bari of hemchi;
Controla tur objeto paden y pafo di cas cu por tin awa para (manera vas cu flor, baki awa di mascota, etc) riba larva nan di sangura.

Proteha bo mes pa bo no haya Dengue, esaki bo por haci door di:
Bista paña cu manga y pia largo durante oranan di atardi pa anochi;
Uza repelente contra sangura riba cuero cu no ta cubri cu paña;
Den espacio pafo di cas cende un mecha of uza bela contra sangura;
Cera porta y bentana di cas prome cu bira scur of uza screen;
Evita di bishita areanan unda bo ta consciente cu tin hopi sangura;
Fliet paden di cas, camber, oficina y areanan cu bo ta frecuenta regularmente cu producto pa mata sangura.

Proteha otronan rond dibo ora cu bo tin sintomanan di Dengue of tin Dengue. Esaki bo ta haci door di bay bo dokter di cas pa confirma si bo tin Dengue y evita di wordo pica pa sangura. E sintomanan ta entre otro:
Keintura
Dolor di cabes
Biramento di stoma of sacamento
Diarrea
Dolor di weso, joints y musculo (dolor di curpa)
Dolor di wowo
Rash

Si bo tin un of mas sintoma nan ariba menciona, acudi na bo dokter di cas pa e por evalua bo. Ta importante pa bo informa bo dokter di cas ki dia bo a cuminsa sinti malo pa asina e por haci test nan adecua di laboratorio. Si bo dokter diagnostica bo persona sospecho di Dengue, tuma nota di lo siguiente:
Evita di wordo pica door di sangura
Paracetamol ta e unico remedi cu bo por bebe, otro pilder nan por causa sangramento (manera ibuprofen, diclofenac, etc)
Bebe hopi likido pa mantene bo mes hidrata
Sosega lo mas posibel

Den nos siguiente relato di prensa nos lo bin cu mas detaye riba e caso nan di Dengue na Aruba. Pa mas informacion like nos Facebook page Directie Volksgezondheid DVG Aruba, Follow nos riba Instagram directie_volksgezondheid_aruba, subi nos website www.dvg.aw, yama nos na 5224200 of mail nos na [email protected]

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio