Home » Advertencia urgente:  Casonan recien di secuestro y extorcion di turistanan Arubiano bishitando Colombia

Advertencia urgente:  Casonan recien di secuestro y extorcion di turistanan Arubiano bishitando Colombia

by Admin
0 comment 232 views

 

 

ORANJESTAD – Recientemente e Oficina Central Nacional di INTERPOL Aruba, a hay su mes  confronta cu casonan alarmante regardando residentenan di Aruba riba vacacion na Colombia. Ta trata di casonan serio di secuestro y extorcion den ciudadnan manera Medellín y Bogotá.

 

Practicanan preocupante

Mayoria di biaha e victimanan ta hende homber cu ta reacciona riba anuncionan sexsual pa prostitucion of masage erotico cu nan ta  ofrece via medionan digital. Ta haci e cita sea na cas di e persona cu ta brinda e servicio of den camber di hotel di e victima.

 

Metodo peligroso

Ta droga e victima  cu Scopolamina, un substancia sumamente poderoso y peligroso conoci tambe como ‘Devil’s Breath’. Nan ta aplica e droga aki na un manera astuto: 

  • Sea suplando esaki den forma di polvo fini den cara di e victima;
  • Poniendo esaki riba cuero di e dama. Asina cu e homber bin den contacto intimo cu e dama e ta wordo droga inconscientemente.

 

Consecuencianan

Bou influencia di Scopolamina, e victimanan ta perde boluntad y conocemento, haciendo nan sumamente facil pa manipula. Unabes inconsciente, e delincuente(nan)  ta  horta placa, carchi di credito, telefon y tur otro pertenencia di balor for di e victima. Hopi biaha, e delincuentenan ta logra haya acceso na datonan sensitivo como por ehempel datonan bancario, foto y mas. Esaki ta posibel pa motibo cu e victima, bou influencia di e substancia, ta duna tur informacion sin opone su mes.

 

Tocante Scopolamine

Scopolamina, ta un substancia di tipo alcaloide, deriva for di e planta “Datura Stramonium”, conoci pa su efectonan halusinogeno y sedante. E ta causa temporalmente e perdida instantaneo  di memoria, desorientacion y perdida di voluntad. Tambe e ta haci cu e victima ta bira vulnerabel pa manipulacion. 

 

Yamada urgente pa cautela

Nos ta conseha cu urgencia pa ta extremamente cauteloso ora di reacciona riba e tipo di anuncionan aki  como tambe ora di haci citanan cu desconocirnan den exterior. Keda  Semper alerto y proteha bo mes y bo ser keri contra di e crimen serio aki.

 

Siguridad prome

Bo siguridad ta nos prioridad. Si bo ta planea di viaha pa areanan caminda e tipo di practicanan aki ta conoci, sea extra cauteloso y comparti bo plan di viahe cu personanan confiabel.

 

Pa mas informashon of si bo tin sospecho di un caso similar, tuma contacto inmediatamente cu INTERPOL Aruba of cu Cuerpo Policial.

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio