Home » Parlamentario Guedez-Erasmus (MEP): “Ami ta echt di acuerdo cu esaki” Participacion di hende muhe den politica ta di gran balor

Parlamentario Guedez-Erasmus (MEP): “Ami ta echt di acuerdo cu esaki” Participacion di hende muhe den politica ta di gran balor

by Admin
0 comment 142 views

ORANJESTAD, Aruba 13 di maart 2024: Diabierna ultimo a celebra Dia Internacional di Hende Muhe den un tremendo manera. Despues di 4 aña sin a celebra e dia aki, Gabinete Wever-Croes II a invita tur hende muhe na Aruba pa un conferencia di inspiracion y empoderamento.

Relaciona cu e evento aki, Parlamentario di Fraccion di MEP, Darlaine Guedez-Erasmus a expresa cu e dia aki rond di 800 hende muhe a bini hunto pa asina celebra e bunita fecha aki.
Desde cuater aña pasa, ora cu Covid a drenta, no por a organisa e evento aki mas. Pero diabierna cu a pasa, por a mira con e hende muhernan tabata asina contento di por ta presente un biaha mas na e evento masha grandi pa celebra e dia aki, Guedez-Erasmus a expresa.

E parlamentario a indica cu “eynan mi persona tabata presente unda cu mi por a wordo inspira sigur di tur e hende muhenan cu por a trece nan speech dilanti pa asina motiva cada hende muhe riba diferente area”.
Sra. Desiree Helder di Oficina di Estadistica a referi na un investigacion cu a wordo haci pa mira con hende muhe ta wordo mira den e comunidad di Aruba.

Algo cu a impacta sigur tabata e parti di hende muhe den politica. For di e encuesta a keda demostra cu rond di 90 porciento di e personanan ta desea di mira mas hende muhe como minister of como parlamentario.
Actualmente, Aruba tin dos hende muhe como minister y ocho hende muhe den Parlamento. Pueblo kier mira mas participacion den e posicionnan aki, a remarca y “ami ta echt di acuerdo cu esaki”.
“Como hende muhe den Parlamento, hopi biaha ta importante pa nos ta presente, pa nos ta na mesa unda nos por dialoga, papia riba e leynan durante di e reunionnan. Pero tambe ta importante cu nos por entrega nos mocionnan cu nos deseonan. Como hende muhe nos ta focus hopi riba con hende muhe ta sinti, su prioridadnan, ta mas facil convivi cu nan pensamento y di e manera aki trece mocionnan padilanti pa asina hende muhernan nan puntonan bini tambe pa dilanti den nos comunidad”, Darlaine Guedez-Erasmus a declara.

Mas cu claro, a bisa cu e ta contento cu na Aruba tin un prome minister femenino cu ta haciendo un tremendo trabao y esaki ta bunita pa mira cu tin hende muhe fuerte poniendo un balans bunita den comunidad.
“Como parlamentario, den e reunion publico di presupuesto 2024 di Pais Aruba, m’a entrega dos mocion unda mi deseo ta pa mira un cabina na aeropuerto pa asina e mamanan por duna lech’i pecho na nan baby mas den priva. Ta algo importante pa nos localnan, pero tambe e bishitantenan tin un lugar unda nan por sinta trankilo”. Esaki tin na otro paisnan caba.
Un otro mocion cu a keda entrega e mesun dia di e reunion aki tabata pa na aeropuerto por tin un rij special pa mamanan na estado, mamanan cu nan yiunan chikito of yiunan special. Eseynan ta ehempel di puntonan cu e parlamentario a trece dilanti cu ta hopi importante pa e hende muhenan.

Finalmente, Guedez-Erasmus a expresa: “Mi kier encurasha e damanan, specialmente esnan cu tin un aspiracion politico pa tuma curashi y postula bo mes riba listanan, riba partidonan politico pa asina abo tambe ta di gran contribucion na nos pais”.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio