ORANJESTAD – Departamento di Asuntonan Economico, Comercio y Industria y su unidad Exprodesk ta organisa ‘Aruba Showcase Event- Promocion y Exhibicion di productonan di Aruba y e lansamento di e Webpage Aruba Showcase’ na Sun Plaza Mall dia 15 maart 2024 di 6:30pm pa 9:00pm y entrada lo ta completamente gratis! ‘N Fuzion lo t’ey pa duna ambiente y entretene publico presente. Bar y cushina lo ta bon surti y lo ta na encargo di Chichi’s Snack Truck & Catering. Sr. Geoffrey Wever, minister di Asunto Economico, Comunicacion y Desaroyo Sostenibel lo ta presente pa e lansamanto di e webpage y evento.
Pueblo di Aruba, prepara pa un evento espectacular cu no solamente lo resalta e variedad di productonan produci localmente sino cu tambe lo ta e lansamento di e ‘Webpage Aruba Showcase’. ‘Aruba Showcase Event’ ta bay ta un celebracion dobel, brindando pueblo di Aruba e oportunidad pa bin explora e diversidad di productonan di calidad halto cu Aruba tin pa ofrece. ‘Aruba Showcase Event’ kier asina fungi como un plataforma unda negoshinan local por exhibi y potencialmente bende nan productonan, contribuyendo na Aruba su economia y cultura vibrante y asina refleha e creatividad y innovacion di empresarionan Arubano.
‘Aruba Showcase Event’
- Exhibicion di productonan “Original di Aruba”: tur presente lo tin e oportunidad pa experimenta pa nan mes y cumpra un variedad di articulonan produci localmente, cu ta e.o. pica, cosmetica (habon, makeup, desodorante, proteccion solar, etc.), chuculati, productonan masculino pa barba, siga completamente produci na Aruba, obranan di arte, diferente biña y likeur di casho y honing, tequila di mango y coco traha cu awa di nos lama, prendanan di glas di lama, badpak, paña y acesorio di moda (sostenibel) y mucho mas.
- Lansamento di e ‘Webpage Aruba Showcase’: e evento lo lansa oficialmente e ‘Webpage Aruba Showcase’ cu lo brinda un plataforma digital pa tur negoshi local promove y bende mas producto despues di e evento. E webpage tin como meta pa conecta nos negoshinan local cu un audiencia mas amplio y asina fomenta crecemento economico y amplia e alcance di nos productonan local riba nivel mundial.
Ainda tin oportunidad pa tur negoshi, cu tin un producto local, pa expone esakinan riba e ‘Webpage Aruba Showcase’. Pa por considera bo negoshi of producto como ‘di origen local’ tin algun rekisito cu mester cumpli cu ne. E rekisitonan cu ta necesario ta lo siguiente:
- Negoshi local mester ta registra na Kamer van Koophandel (KvK) y tin un vestigingsvergunning di Departamento di Asuntonan Economico, si ta aplicabel;
- Producto mester ta completamente original di Aruba (materia prima y e producto final ta traha/transforma/procesa na Aruba);
- Den caso cu e producto NO ta completamente original di Aruba, e mester tawata ‘transforma/procesa’ na Aruba (e materia prima lo por bin di afo pero e producto final mester ta traha/transforma/procesa na Aruba).
Pa registra pa e oportunidad aki lo mester manda un e-mail na: [email protected].
Loke ta necesario pa registra ta:
- Un descripcion di e producto (maximo 150 palabra);
- Potret di e producto;
- Informacion di contacto, links di e website y/of Facebook y/of Instagram;
- “Letter of Consent” yena y firma. (Esaki ta mand’e via e-mail na momento cu registra).
Pa mas informacion over di e evento y webpage “Aruba Showcase”, y con pa participa, por tuma contacto cu sra. Sharon Meijer via: [email protected]