San Nicolas Aruba – Studiantenan di secundo aña di e facultad di Bachelor of Arts in Organization, Governance and Management di Universidad di Aruba ta organisa dos actividad social den bario di Kiviti y ta puntra colaboracion di habitantenan of organisacion nan den San Nicolas pa sosten.
Den cooperacion cu Aruba Doet y FCCA studiantenan ta organisa dos iniciativa cu e meta pa crea colaboracion y unidad den comunidad di Kiviti, Mabon. E dos iniciativa ta consisti di un limpiesa den e bario riba 15 di Maart 2024 y un tayer di arte pa comunidad riba 16 di Maart 2024. Transformando un area neglisha den uno limpi y accesibel bou di e nomber Plaza Kiviti. Cu e proyecto aki ta mira pa rata e retonan di comunicacion y interaccion limita entre residentenan. Pa responde na e retonan aki, e proyecto Plaza Kiviti lo realisa un plataforma pa fomenta interaccionnan social, crea un espacio recreativo pa comunidad, symbolisa pa instalacionnan di arte vibrante crea door di e residentenan y asina crea un sentido di co-creacion y unidad entre e residentenan di Kiviti.
Yamada na comunidad di Aruba
Pa e proyecto aki por ta uno exitoso nos ta buscando 10 boluntario cu por duna un man pa e actividad di limpiesa, esaki ta tuma lugar diabierna 15 di maart 2024, parti mainta entre 8or di mainta.. Trabounan di limpiesa ta consisti di trabounan di chapi, kitamento di pallet, cortamento di palo y pikimento di plastic. E limpiesa ta esencial pa por crea un espacio liber di sushi cu mas seguridad unda habitantenan por disfruta y pasa dia den aire liber. Nos kier hasi un yamada na comunidad di Aruba pa hasi e Plaza Kiviti uno exitoso. Participa y duna un man,
trece bo herment, bo lo ricibi bo Aruba t-shirt, un dushi coffee, coy bebe y come. Bo lo sera conoci cu otro boluntarionan, conoce e importancia di trabou boluntario.
Registracion
Tur persona cu ta interesa pa duna un man y realisa e proyecto aki por registra pa e proyecto di KIVITI via e website di ArubaDoet.com. Kinan lo haya mas informacion di e dos actividadnan y nan meta. Bini un bini tur, conoce hende nobo yuda crea un espacio bunita pa comunidad por disfruta di dje. Pa mas informacion por tuma contacto cu nos na +297 565 3455 of [email protected] of bishita nos riba social media/kivitiarubadoet
