Home » A.T.A. ta Reconoce Hans Gesk durante Feria di ITB na Berlin

A.T.A. ta Reconoce Hans Gesk durante Feria di ITB na Berlin

‘Un aliado fuerte di KLM pa Aruba pa mas cu dos decada den e mercado Aleman’

by Admin
0 comment 101 views


 

Aruba Tourism Authority (A.T.A.) ta orguyoso di reconoce e contribucion y sosten excepcional di Hans Gesk, Manager Leisure Sales di Alemania na Air France – KLM durante dos decada. A.T.A. a tuma un momento pa expresa gratitud y aprecio durante un recepcion special na e booth di Aruba durante feria di ITB Berlin.

 

E trayectoria di Hans Gesk ta di mas cu binti aña cu KLM caminda cu e a demostra compromiso fuerte pa promove Aruba como un destino di biahe destaca entre turistanan Aleman. Desde su inicio cu A.T.A. Europa na 2001, Gesk a hunga un papel vital den facilita bishita di prensa, bishita di familiarization trips pa agentenan di biahe, y varios activacion di mercadeo, demostrando su cariño autentico y sosten pa e Isla Felis.

Aunke cu Hans Gesk ta conta cu varios destinacion bou di su responsabilidad, Hans semper a priorisa Aruba, participando den conferencianan manera “Aruba Meets Europe”, y a hasta kumpra un time-share riba e isla. E aña aki ta marca su ultimo participacion na ITB Berlin mientras e ta prepara pa bah acu pensioen, haciendo e tributo di A.T.A. aun na su lugar.

 

Reconociendo su servicio sobresaliente, A.T.A. a otorga Hans Gesk e titulo simbólico di Embahador Honorario, acompaña pa un bunita pieza di Murano Lava Glass di Aruba den color blauw di KLM.

 

Expresando su gratitud y sorpresa, Hans Gesk tabata visiblemente emociona pa e gesto di A.T.A., reflehando e aprecio profundo pa su contribucion na industria di turismo di Aruba.

 

A.T.A. ta extende un danki sincero na Hans Gesk pa su dedicacion y ta desea pa un pensioen yena di gozo y trankilidad. Su legado como un berdadero embahador di Aruba lo keda como un ehempel y inspiracion na un y tur.

 

Tocante Aruba Tourism Authority (A,T.A.)

Desde 1 di januari 2011, Aruba Tourism Authority ta opera como un entidad ‘Sui Generis’. Un organizacion independiente den e esfera publico. Aruba Tourism Authority ta fungi como ‘Destination Marketing and Management Organization (DMMO)’ y ta responsabel pa uni interes turistico entre socionan local e internacional. A.T.A. ta pone hopi enfasis riba e e modelo di “High Value-Low Impact” cu ta para pa un balans entre aumenta e balor economico di e bishitante, posiciona Aruba como un pais desea y sostenibel, y posiciona Aruba como lider di desaroyo como un destinacion. Cu meta pa sigui mantene esfuerzonan den linea segun e balans menciona, y logra aumenta entrada pa medio di calidad di turismo en bes di e volumen cu nos destinacion ta ricibi. Capacidad di carga ta sigui ricibi atencion di parti di A.T.A.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio