A presenta e Relato Anual 2023 y plannan sumamente ambicioso y interesante pa aña 2024
ORANJESTAD — Despues di e conferencia di OCTA na Bruselas, Prome Minister Evelyn-Wever-Croes actualmente ta na Hulanda pa atende varios reunion. Diabierna ultimo, 1 di maart, Prome Minister a reuni na Arubahuis cu Minister Plenipotenciario Ady Thijsen, cu directora nobo di Arubahuis, señora Jocelin Croes y cu e personal di Arubahuis.
ENTREGA DI RELATO ANUAL 2023 Y JAARPLAN 2024
Durante e reunionnan aki a trata diferente tema cual uno hopi importante tawata e entrega di e Relato Anual 2023, cu e personal completo di Arubahuis a traha riba e contenido unda ta describi tur e trabou y logronan di Kabinet di Aruba durante aña 2023. Tambe e personal di Arubahuis a presenta na Prome Minister e Jaarplan 2024, esaki pa cada kwartaal detayadamente y cu plannan sumamente ambicioso y interesante.
WEBSITE LO WORDO LANSA PRONTO
Durante e reunion tambe e personal di Kabinet di Aruba a presenta na Prome Minister e website nobo di Arubahuis unda Prome Minister a keda hopi impresiona cu e contenido amplio di esaki y tur e informacionnan importante cu por haya riba e website aki. E website aki lo wordo lansa durante e dianan venidero.
Prome Minister a menciona cu por mira cu Kabinet di Aruba tin un bon vision y asina por yuda tur nos Arubianonan, specialmente nos studiantenan na Hulanda na e miho manera y tambe por asisti Gobierno na Politiek Den Haag y cu relacionnan den Europa.
UN REUNION MASHA AMENO CU STUDIANTENAN
Tambe Prome Minister tawata tin e oportunidad pa topa cu varios studiante y asina combersa y defini hunto e miho manera pa sirbi e interes di cada studiante. Prome Minister a remarca cu e studiantenan ta hopi motiva y ta un inspiracion pa su persona.
“E reunionnan tawata sumamente positivo y fructifero y a duna resultadonan hopi importante. Mi ta gradici e personal completo di Arubahuis pa e bon y bunita trabou y e studiantenan pa nan asistencia y contribucion”, Prome Minister a finalisa bisando.