ORANJESTAD: Durante fin di siman a tuma luga e competencia escolar entre e scolnan di Aruba, Boneiro y Curaçao. Diasabra ultimo, den un sala yen na Compleho Deportivo Frans Figaroa na Noord, Colegio San Hose y Colegio Felipe B. Tromp a topa otro den e gran final di trefbal di Weganan Interinsular 2024. Minister Endy Croes a presencia e wega final pa duna sosten y apoyo na ambos scol di Aruba. E partido final tabata yena di tension, suspenso y emocion. Importante pa remarca cu den e weganan eliminatorio na scol, Colegio Felipe B. Tromp a titula campeon y Colegio San Hose subcampeon y asina ambos scol a ricibi e oportunidad pa representa Aruba den Weganan Interinsular 2024. Sigur e tabata un bunita final, den set 5 a keda 1 hungado cada banda riba tereno. Den e ultimo hugada e alumno di Colegio San Hose a catch e bala di su contrincante pa asina titula campeon y Colegio Felipe B. Tromp subcampeon di trefbal. Curaçao a keda na di tres luga y Boneiro na di cuatro luga di e campeonato escolar. Na final Minister Endy Croes a haci entrega di e medaya na e ganadonan di Weganan Interinsular 2024. Pa conclui, Minister Endy Croes ta felicita tur scol y specialmente e alumnonan cu a briya den e competencia escolar. Cu deseo, disciplina, dedicacion y determinacion boso a logra. Masha pabien!
