ORANJESTAD– “Ta algo cu tur hende a nota, cu tin un caos den trafico. Hendenan cu no ta tene nan mes na ley of regla, poniendo trafico en general pero en especial bida di hende na peliger. Mi ta di acuerdo cu Minister di Husticia Rocco Tjon y sumamente satisfecho cu e campaña ‘Trafico Sigur’ cu lo pone orden bek”, Prome Minister Evelyn Wever-Croes a expresa.
Ministerio di Husticia y Asuntonan Social hunto cu demas departamento hudicial lo lansa un campaña di conscientisacion pa mas siguridad den trafico. E campaña ta cuminsa dia 1 di maart y su meta principal ta pa mehora siguridad riba caminda. “Cu e campaña di conscientisacion aki nos ta sigur di mira cambionan grandi den comportacionnan cu por trece trafico den peliger, entre otro reduci accidentenan. E campaña lo enfoca riba coremento bou influencia di alcohol, velocidad halto, distraccion den auto, uzo di seat belt y child seat; con pa uza interseccionnan den trafico; con pa core of anda riba careteranan nobo manera Watty Vos Boulevard y Green Corridor cu pa hopi hende ta trece confusion y por causa accidente.
Pareu cu e campaña ‘Trafico Sigur’ lo lansa e website www.traficosigur.aw na unda tur hende por haya informacion importante di siguridad den trafico. E website no solamente ta informativo pero tambe interactivo na unda cu usuarionan lo por manda preguntanan y preocupacionnan y nan lo ricibi contesta riba esakinan.
“Mi ta gradici tur cu a colabora den e iniciativa aki pa haci nos trafico mas sigur y ta pidi tambe colaboracion di nos ciudadanonan. Ban nos tur haci nos trafico mas sigur!”, Prome Minister a accentua.