Diabierna anochi Minister Maduro tabata invita pa Sociedad di Bijbel den Caribe Hulandes pa asina por ricibi e prome Bijbel den ortografia oficial di Papiamento di Aruba. Un deseo cu tabata biba di hopi tempo cerca creyentenan na Aruba a keda realisa y awo tur hende tin acceso na e Palabra di Dios den nos dushi Papiamento di Aruba. Pa e ocasion bunita aki Minister Maduro di Cultura a comparti cu esnan presente dos anecdota di su trabou como mandatario.
E prome ta di tempo di pandemia, y Minister Maduro a expresa den e siguiente forma. “Como Minister encarga cu finansa y economia, dos tereno cu a sufri daño grandi, tabata tin hopi presion y bida di hende tabata na peliger. Den un di e reunionnan e presion a bira dimas, mi a flihi y a punto di bisa te aki mi ta yega. Bahando cabes, riba e pagina di mi notebook, mi por a lesa e frase di Salmo 46:10 cu ta bisa, ‘Be still, and know that I am God.’ Un frase cu ta recorda nos pa para keto y realisa cu Dios semper t’ey, e ta guia nos y ta percura pa obra atraves di nos pa asina nos por cumpli cu e trabou. Dios no ta duna nos un carga cu nos no por carga. Ta e Salmo 46:10 aki ta locual a yena mi cu sabiduria, forza y pasenshi pa logra haci un trabou grandi na bienestar di Aruba.”
