ORANJESTAD – Diasabra awor, Futura ta organisando un evento unico pa hobennan di 14-18 aña cu ta interesa den Ciencia, Tecnologia, Ingenieria, y Matematica, yama STEM X Youth Summit. Prome Minister Evelyn Wever-Croes a indica cu e conferencia aki di Science, Technology, Engineering, and Mathematics (STEM), lo ofrece e participantenan un dia yena cu actividadnan pa stimula e curiosidad y interes den cada un di nan pa loke ta e diferente topiconan den e mundo di STEM.
Prome Minister a expresa cu e dia aki tambe lo ta un oportunidad pa e hobennan desaroya diferente habilidad importante manera creatividad, colaboracion, pensamento critico, y nan habilidad pa resolve problema. E industrianan cu ta cay bou e categoria STEM ta esnan cu mas ta creciendo rond di mundo, habriendo portanan den e mercado laboral, pa e hobennan cu ta studia den e ramo aki. P’esey ta hopi importante pa desde awor caba, como gobernantenan di pais Aruba, nos prepara nos hobennan, pa e oportunidadnan laboral den futuro.
E conferencia aki lo cuminsa pa 9:30 am cu un charla di srta Jillian Oduber, cu ta un studiante di ‘Aerospace Engineering’ na TU Delft, na unda e lo comparti su experiencia studiando den STEM y e importancia di esaki pa futuro. Despues di e charla importante aki lo sigui diferente workshop interactivo, na unda cada hoben di cualkier nivel por participa, cu e meta pa educa nan mientras nan ta pasa un dia placentero.
Na final di e conferencia, lo tin un expo pa ilustra diferente organisacionnan cu ta envolvi den STEM na Aruba. Tur esnan cu ta interesa di studia of traha den e areanan di STEM, e lo ta un bon oportunidad pa wak ki opcionnan tin disponibel.
STEM X Youth Summit lo tuma luga diasabra dia 24 di February na Hilton Resort for di 9:30 AM pa 4:00 PM. Pa mas informacion y pa registra, bishita stemxaruba.com.