Minister Endy Croes: WEGANAN INTERINSULAR 2024 TA TUMA LUGA NA ARUBA DI 29 DI FEBRUARI PA 3 DI MAART PROXIMO

ORANJESTAD: Durante conferencia di prensa, Minister Endy Croes a elabora riba Weganan Interinsular 2024 cu ta inicia fin di luna aki na Aruba. Weganan Interinsular ta e competencianan deportivo escolar entre e islanan Aruba, Boneiro y Curaçao. Na 2022, Minister Endy Croes hunto cu Minister di Enseñansa, Ciencia, Cultura y Deporte di Curaçao Sr. Sithree van Heydoorn y diputado di Infrastructura y Deporte di Boneiro e tempo ey Sr. James Kroon a firma un acuerdo pa reinicia Weganan Interinsular despues di shete (7) aña. Na 2023 Weganan Interinsular a reinicia bek cu seis (6) disciplina y e competencia tabata exitoso. E aña aki pa di dos (2) aña consecutivo Weganan Interinsular ta tuma luga y a aumenta di (seis) 6 pa (nuebe) 9 disciplina. Weganan Interinsular ta inicia na Aruba di 29 di februari pa 3 di maart den e disciplina di trefbal di mucha muhe, dam y ahedres. Despues di esaki, Weganan Interinsular lo continua na Boneiro di 14 pa 17 di maart, unda cu e mucha- y hobennan lo participa den e disciplina di basketball di mucha homber, aquatlon y futbol di mucha muhe. E clausura lo tuma luga na Curaçao di 11 pa 14 di april, unda cu e scolnan lo participa den e disciplina di basketball, y atletismo y volleyball. Na luna di december ultimo, a lansa e logo nobo di Weganan Interinsular (WI) y e logo ta hopi popular na e islanan. Pa conclui, Minister Endy Croes ta desea tur scol cu ta participa den e competencia di Weganan Interinsular 2024 hopi exito. Cu deseo, dedicacion, determinacion y disciplina ta logra!