ORANJESTAD—Diaranson 14 di februari, Conseho di Minister a reuni cu e delegacion di Eerste Kamer di Hulanda. 15 miembro di Parlamento di Eerste Kamer cu ta forma parti di e comision fiho pa relacionnan den Reino, tawata presente den un reunion cu a dura casi dos ora den cua Gobierno di Aruba a duna un presentacion, un ‘Snap Shot’ di unda Aruba ta para na e momento aki. Despues di e presentacion, tawata tin oportunidad pa miembronan di Eerste Kamer haci pregunta y Gobierno a duna tur informacion cu nan a pidi. Prome Minister Evelyn Wever-Croes a expresa e importancia pa dialoga y duna informacion corecto. Esaki tambe, Prome Minister a indica, tawata e meta di Gobierno di Aruba.
Prome Minister a duna di conoce cu e reunion a cana hopi bon y e miembronan di Parlamento di Eerste Kamer tawata hopi interesa den e informacionnan cu Gobierno a duna y ta compronde e posicion di Aruba. A elabora riba e tema di refinanciamento di e debe cu Hulanda. Mayoria di Eersta Kamer ta di acuerdo cu Aruba cu Hulanda no por cobra e 6.9%. Y esaki ta loke Profesor Nicolai a indica esaki tambe varios biaha den debatenan. Otro miembronan di Eerste Kamer tambe a expresa esaki y den e reunion a ripiti esaki.
“Mi tin tur fe y confiansa cu nan lo yuda nos den e lucha aki pa asina Aruba logra baha e interes halto aki di 6.9%. Na fin di dia ta hopi imporante pa tin bon relacion cu institunan asina cu ta trata leynan cu tin di haber cu Aruba y p’esey ta hopi importante pa reuni y intercambia informacion”, Prome Minister Evelyn Wever-Croes a expresa.
