“Ta importante riba Dia Internacional di Hende Muhe, pa para keto un rato y wak con hopi e ser femenino a progresa, pero tambe con hopi falta pa por logra tur loke mester logra”
ORANJESTAD – Dia 8 di Maart proximo, ta Dia Internacional di Hende Muhe. Un dia importante, un dia cu internacionalmente Nacionnan Uni a decreta como dia di hende muhe, pa para keto na e posicion di hende muhe rond mundo.
Prome Minister Evelyn Wever-Croes a expresa cu ainda por sinti e diferencia den hende homber y hende muhe, y ainda tin paisnan cu tin diferencia den derecho pa hende homber y hende muhe. Esaki sigur por a wordo nota mas ainda durante e pandemia, na unda por a nota, cu ta e hende muhenan mas tanto a sacrifica pa keda cas ora e muchanan no tabata tin scol, of nan mester a cambia di trabou, y/of traha menos ora.
Prome Minister a splica cu na Aruba tin hopi hende muhe cu a progresa, y por nota tambe, cu hopi posicion clave ta wordo ocupa pa un ser femenino. Apesar di esaki, aunke no tanto visibel, ainda tin diferencia entre e ser femenino y masculino, specialmente na salaris y trato. Tambe, por nota e diferencia den posicionnan di liderazgo di pais Aruba, na unda cu den un total di 8 minister, tin dos cu ta femenino (25%), y den Parlamento, di 21 Parlamentario, tin 8 hende muhe (38%). E porcentahenan abou aki, sigur tin un efecto riba decisionnan, na unda ta importante pa tuma na cuenta e necesidad y deseonan di hende muhe, cu mester wordo tuma. Si Aruba ta desea pa tene na cuenta e deseonan di hende muhe ora di tuma decision, ta importante pa hende muhe ta na mesa como parti di e esnan cu ta tuma e decisionnan.
“P’esey ta importante pa riba Dia Internacional di Hende Muhe, para keto un rato y wak con hopi e ser femenino a progresa, pero tambe con hopi falta pa por logra tur loke mester logra”, Prome Minister a expresa.
Prome Minister a indica, cu pa logra haya hende muhe yega na mesa di decision, lo mester inverti, pa asina yega na un punto, cu ora un hende muhe den posicion clave retira, ya caba tin un fila di hende muhe, cla pa asumi e posicion. Esaki sigur ta importante pa mundo por ta mas exitoso, y pa tin un desaroyo duradero. Cu esaki, mundo lo por sigura cu awor y den futuro, e bos di hende muhe lo sigui wordo scucha.
“E aña aki, nos ta para keto na e fecha di 8 di Maart un biaha mas, y nos lo celebre e aña aki den grandi, mescos cu aña 2020, prome cu pandemia. Na 2020, a organisa un conferencia grandi na Renaissance, na unda a invita tur hende muhe gratuitamente pa bin celebra hunto e dia importante aki. E aña aki, un biaha mas nos ta extende un invitacion na tur e sernan femenino pa hunto nos celebra Dia Internacional di Hende Muhe. E evento aki lo ta dia 8 di Maart, di 8 am – 12 pm, y entrada lo ta gratis. Pa tur esnan interesa, lo mester registra y e link di registracion lo wordo publica durante e siman benidero. Por cuminsa reserva e fecha, pa asisti na un mainta yena cu celebracion di nos como hende muhe. Un mainta di analisis y reflexion di unda nos ta para awe, y unda nos kier yega.
E tema di e aña aki ta Inspira Inclusion di Hende Muhe. Nos ta haciendo un encuesta, di con hopi e hende muhe ta sinti su mes inclui aworaki, pa asina wak di e perspectiva di hende muhe y homber, kico mas mester wordo haci. E resultadonan lo wordo comparti durante e conferencia. Cu e informacion aki, nos lo celebra, refleha, y prepara kico mester wordo haci aki na Aruba”, Prome Minister a expresa.