Aruba por ta orguyoso di su muchanan den Carnaval 70
ORANJESTAD – Den fin di siman, a tuma luga e ultimo parada di mucha pa Carnaval 70 na San Nicolas, na unda por a admira un parada yena di luho, creatividad, color y fantasia. Un carnaval, na unda nos muchanan por a gosa sanamente, manteniendo asina parti di nos cultura bibo.
Prome Minister Evelyn Wever-Croes a expresa di ta sumamente contento y orguyoso di Aruba su carnavalistanan, y di cada grupo, pa nan pasion, creatividad, trabou, y dedicacion, pa asina presenta nan mes di un manera espectacular, dunando bida y balor na Aruba su carnaval.
Durante e paradanan por a nota e entusiasmo di cada mucha, nan tabata baila, y gosa, presentando asina e tema di nan grupo na un manera creativo y colorido. Prome Minister ta gradici tur e mayornan cu a permiti nan yiunan participa den e paradanan, y pa nan tempo dedica na decora paña, carosa y roadpiecenan. “Sin e esfuerso di cada mayor, esaki no lo tabata posibel. Boso aporte na Aruba su Carnaval ta di aprecia”.
Tambe, Prome Minister kier a desea tur esnan cu lo ta partcipando den e ultimo paradanan grandi e fin di siman venidero, tur clase di exito, y pa nan gosa carnaval sanamente.