Ministerio di Integracion hunto cu Asociacion di Cuerpo Consular di Aruba
“Aruba ta un solo pueblo, y Ministerio di Integracion cu ACCA lo traha hunto pa Aruba”
ORANJESTAD – Diamars mainta, Minister di Integracion Glenbert Croes hunto cu su conseheronan huridico tabata presente na un presentacion di e Asociacion di Cuerpo Consular na Aruba. E presentacion aki, presenta pa sra Solangel, a wordo yama, e proyecto aliansa, y a enfoca riba e posibilidad, pa tur e consuladonan na Aruba y esnan den Caribe Hulandes, traha hunto cu Ministerio di Integracion, pa crea un plataforma di conseho, guia, asistencia, y apoyo na e henter e comunidad stranhero cu ta biba na Aruba.
Un di e preocupacionnan cu a wordo treci dilanti, ta e echo cu tin hopi ciudadano stranhero na Aruba cu ta wordo mal conseha, of ta wordo kita placa pa asina por tramita nan docmentonan pa permiso. Pa evita e casonan aki den futuro, kier bin cu un plataforma, na unda ministerio di integracion hunto cu e consuladonan lo traha hunto pa asina conseha, guia, y duna asistencia na e ciudadanonan stranhero aki, pa na un manera legal y sin problema por yega na nan permiso. A traves di e trayecto di integracion responsabel cu tin, y e necesidad riba mercado laboral pa trahadonan, lo duna preferencia na tur local prome y na tur cuidadano stranhero cu a drenta Aruba legalmente.
Mirando tur e proyectonan, pa loke ta e zona di refineria, cu lo bay bin, lo bay tin e necesidad di trahadonan responsabel y di bon boluntad. E ciudadanonan stranhero cu a yega Aruba di un manera responsabel y legal, y cu tin respet pa e pida baranca aki, ta loke e mercado laboral mester, y pa e motibo aki, Aruba ta dispuesto pa brinda nan e oportunidad pa labora akinan, y asina forma hunto cu nan famia, un miho bida na Aruba.
“Mi ta gradici e consuladonan pa nan iniciativa pa bin cu e plataforma di aliansa aki, paso ta solamente trahando hunto y uni, nos por sigura un servicio humano y husto pa e comunidad stranhero, cu tin e deseo di bin forma un hogar aki na Aruba. Aruba ta nos tur, Aruba ta un solo pueblo. Manera nos libertador Betico Croes a bisa, “Arubiano no ta solamente esun cu a nace na Aruba, sino tur esnan cu a bin pa aporta na progreso y bienestar di nos isla”. Aruba ta un solo pueblo y Ministerio di Integracion cu ACCA lo traha hunto pa Aruba” Minister Croes a expresa.