“Mi ta gradici VDA pa organisa e curso aki, invertiendo asina den nos profesionalnan pa asina nos tin e siguransa di por tin un Aruba mas sigur”
ORANJESTAD – Recientemente, Departamento di siguridad nacional, Veiligheidsdienst Aruba (VDA), hunto cu autoridadnan Canades di Border Control, a tene un curso pa varios profesional di siguridad, riba con pa reconoce documentonan oficial, y e forma con awendia ta traha documentonan, fraudulento. Prome Minister Evelyn Wever-Croes a expresa, cu e ta di suma importancia pa e profesionalnan ta bon prepara riba e tema aki, pa nan por detecta e documentonan falso aki di leu.
Manera ta conoci, mundo ta birando mas moderno, y esaki ta pone cu tur hende ta bira mas creativo. Aruba ta den recuperacion, cu ta positivo, pero cu esaki, e isla ta atrae tambe infuencianan malo, cu talves por drenta solamente cu documentonan falso. P’esey cu cada paso pa bay padilanti, mester percura pa autoridadnan ta bon prepara, pa sigura cu Aruba ta keda un isla sigur.
“Mi ta hopi contento cu e curso aki a wordo duna. Tin un grupo grandi di profesional local cu a haya e training aki, cu ta mas moderno, pa asina por detecta passpoort, cedula y/of otro tipo di documentonan cu mester pa drenta un pais, cu por ta falso. Tambe, mi ta gradici VDA pa organisa e curso aki, invertiendo asina den nos profesionalnan, pa asina nos tin e siguransa, di por tin un Aruba mas sigur”, Prome Minister a expresa.