A trata varios punto di interes riba e tereno di enseñansa.
ORANJESTAD: Siman pasa, Minister Endy Croes a reuni cu parlamentario Shailiny Tromp – Lee, kende ta presidente di comision fiho di enseñansa den Parlamento di Aruba. Un reunion amplio unda a trata diferente topico di interes. Minister Endy Croes a indica cu tin dos (2) reunion programa pa tuma luga den luna di februari cu den comision fiho di enseñansa den parlamento, unda lo trata, entre otro, e “normbedrag”. Manera ta conoci, desde 2010 no a ahusta e “normbedrag”. Pues, e “normbedrag” tabata core 13 aña atrasa. E “normbedrag” ta ancra den ley y ta e compensacion cu schoolbesturen ta ricibi a traves di “exploitatiesubsidie”. E “normbedrag” ta cubri costo di, entre otro, mantencion y seguro di e edificio di scol y lokaal, limpiesa di edificio y lokaal, coriente, awa y gas, mantencion di mueble di e scolnan, inversion den material di desaroyo “hulpmiddel” y necesidadnan di scol, lesmateriaal y admistracion. E schoolbesturen ta ricibi un suma cu hopi biaha ta miyones di florin, depende di e grandura di e scol pa cubri tur gasto cu a ser menciona. E ley ta bisa cu cada tres (3) aña mester calcula si mester aumenta e suma aki. Minister Endy Croes hunto cu Gabinete Wever – Croes II a corigi esaki, unda cu a haal in te cu aña 2023. Pues, un total di dies (10) aña di retraso otorgando 6.4 miyon florin. E suma aki a keda aproba durante reunion publico den Parlamento di Aruba. Esaki ta significa cu a inverti hopi mas placa den enseñansa pa asina e schoolbesturen por cubri nan gastonan. Tambe, Minister Endy Croes lo duna informacion actualisa di e Doorlichting Rapport y e recomendacionnan den e Landspakket. Ademas di esaki, lo trata recomendacion 11 cu ta regarda e leynan di enseñansa y con leu esakinan ta den e proceso di ehecucion. Conluyendo, Minister Endy Croes a enfatisa cu e tabata un tremendo reunion y lo keda traha hunto pa progreso y bienestar di enseñansa di Aruba.