ORANJESTAD: Recientemente, den un esfera ameno na Plaza Deto Varis, Minister Dangui Oduber a haci anuncio di fase II di e Proyecto di Cas Ariba. Un proyecto bunita y importante pa bario di Santa Cruz y pa Pais Aruba. E proyecto aki ta di Ministerio di Turismo y ta fit den e maneho y vision di haci inversion continuo den mehoracion pa upgrade di e producto Aruba y pa crea atraccion turistico nobo. Minister Endy Croes tabata presente na e anuncio special aki hunto cu Prome Minister di Aruba Sra. Evelyn Wever – Croes, Presidente di Parlamento mr. Edgard Vrolijk, directora di ATA, Sra. Ronella Croes y ex – Premier di Aruba Sr. Nelson Oduber. Fase II di e proyecto ta consisti di un plaza multifuncional, unda cu e turistanan por topa cu nos hendenan local. Lo construi un speeltuin, caminda e muchanan den e bario por haci uzo di dje. Ta bay tin un area pa haci ehercicio y/of practica deporte, lo tin area unda turistanan por haya informacion di Santa Cruz y di historia y cultura di Pais Aruba. Tambe, lo tin un area pa recrea y lo construi tribuna nobo unda cu por organisa diferente evento y/of fiestanan nacional. E lo bira un area caminda localnan por haci uzo di e plaza henter aña. Esnan presente a aplaudi e fase II di e proyecto aki. Pa clausura e evento Claudius y Oreo a trece un bon ambiente musical. Pa finalisa, Minister Endy Croes ta felicita colega Minister Dangui Oduber, Gabinete Wever – Croes II, ATA y Ministerio di Turismo cu e bunita proyecto aki. Pabien na e bario di Santa Cruz.