ORANJESTAD – Diaranson mainta, un dia prome cu e celebracion di Dia di Betico, Prome Minister Evelyn Wever-Croes a haci un bishita na St. Fransiscus College, pa asina comparti cu klas 4, un poco di e historia di Aruba su Libertador, Betico Croes. Durante su bisita, Prome Minister tabata tin e oportunidad di conta e alumnonan con su bida como sobrina di Betico tabata. Esaki sigur a haci e combersacion aki, uno hopi interesante pa e muchanan.
Prome Minister a splica e muchanan, cu Betico tabata un meneer di scol, y p’esey semper tabata atento na con bon nan tabata siña na scol. Tambe el a splica nan di Betico su lucha y su logronan, y a bisa nan cu tur e cosnan grandi aki, cada un di nan tambe por logra si nan ta stima Aruba y si nan traha duro pa logra tur nan metanan.
“Mi ta gradici Juffrouw Nadine Kirindongo, demas docente y e alumnonan di St Fransiscus College pa permiti mi bishita e scol un rato pa asina comparti un poco di Betico su bida, su lucha y su logronan. Tambe mi ta gradici e docentenan pa nan dedicacion y amor den guia nos yiunan na un miho future,” Prome Minister a expresa.
