ORANJESTAD – Un di e scolnan cu Prome Minister EvelynWever-Croes a bishita en conexion cu Dia di Betico ta scol Nos Fortalesa Montessori na Paradera. Prome Minister a expresa cu e tabata un mainta ameno, na unda e tabata tin e oportunidad di sinta cu muchanan di diferente edad pa combersa un poco di e bida di Betico. Tin muchanan cu ta yiunan di tera, pero debi cu tambe tabata tin yiunan di turistanan cu ta bin bishita Aruba pa un tempo mas largo, y ta manda nan yiu scol eynan, e combersacionnan tabata primordialmente na ingles.
Prome Minister a indica cu e grupo tabata uno intersante, cu tabata sa hopi di Betico caba pero tabata tin hopi interes pa siña mas. Esaki sigur ta un gran satisfaccion mirando cu e meta di e bishitanan na diferente scol ta pa duna mas informacion posibel na e muchanan di e bida di Betico, pa asina nan sa kico tur Betico a sacrifica y logra pa pais Aruba.
“Mi ta gradici tur esnan cu ta labora na scol Nos Fortalesa Montessori pa inculca e historia di e bida di Betico den nos muchanan. Ta di e manera aki, nos por mantene e historia di Betico bibo,” Prome Minister a expresa.
