ORANJESTAD: En conexion cu Dia ta Betico, 25 di januari proximo, Minister Endy Croes a bishita scol basico Pius X School. Diamars ultimo, na yegada e cabesante Sra. Sheila Tromp, staf, maestro y e alumnonan di Pius X School a duna e mandatario di Enseñansa un caluroso bonbini. Pius X School ta conta cu un total di 192 alumno. Minister Endy Croes a duna un charla di e historia di Libertador Betico Croes na e alumnonan di klas 5 y 6. Libertador Betico Croes a nace dia 25 di januari 1938 y si e tabata na bida e lo a cumpli 86 aña di edad e aña aki. Betico Croes a laga un herencia valioso pa Aruba, pa e motibo aki nos ta sigui record’e y siña nos muchanan di e lucha cu Betico a hiba pa Aruba haya su Status Aparte. Cabesante Sheila Tromp a expresa cu e ta un orguyo pa nan cu Pius X School tabata e cede unda cu Betico Croes tabata vota. Finalmente, Minister Endy Croes ta gradici cabesante Sra. Sheila Tromp, staf y tur maestro di Pius X School pa e gran trabou cu nan ta haciendo cu e alumnonan y ta desea nan feliz Dia di Betico. Ban celebra Dia di Betico en grande y traspasa e bunita historia aki pa nos yiunan y nos futuro generacionnan.
