Oranjestad, Aruba – Aruba Hotel & Tourism Association (AHATA) ta inverti den nos studiantenan local cu un donacion grandi di ekipo nobo na Colegio EPI. E donacion ta consisti di varios freezer, fryer, forno y mas material indispensabel cu lo yuda mehora e facilidadnan di e progama culinario di e scol.
Representantenan di Colegio EPI a manifesta nan gratitud y entusiasmo pa e donacion ricibi. Resaltando cu e material nobo lo ta di gran utilidad y lo enrikece e experiencia di estudio di nan alumnonan. E ekipo aki ta esencial pa studiantenan por haya entrenamento practico y desaroya e habilidadnan fundamental pa nan futuro profesion.
Como un organisacion di dunador di trabou cu ta traha pa e sostenibilidad di Aruba su turismo y economia, AHATA ta reconoce e papel importante cu educacion ta hunga pa e exito di e industria. E inversion aki ta refleha nan compromiso pa aporta na un forsa laboral prepara y cualifica pa asina yuda sera e “gap” entre educacion y e mercado laboral.
E asociasion lo sigui traha riba diferente iniciativa pa apoya talentonan local y ta spera cu e donacion aki lo no solamente eleva e programa di EPI, pero tambe inspira e alumnonan pa sigui nan formacion profesional cu mas motivacion.