Futura hunto cu Gobierno di Aruba ta entusiasma pa anuncia su proximo evento: STEM X Youth Summit. E conferencia aki ta diseña pa muchanan entre 14 y 18 aña di edad, y lo brinda un experiencia unico den e area di siencia, tecnologia, ingenieria y matematica (STEM).
STEM X Youth Summit lo tuma luga dia 24 di februari, riba un diasabra, den e ballroom di Hilton Aruba Caribbean Resort for di 9:30 di mainta te cu 4 di atardi. E evento lo cuminsa cu un charla cortico di Jillian Oduber, un talentoso ‘aerospace engineer’ Arubiano cu ya caba ta exitoso den e mundo di STEM y lo conta un tiki di su trayectoria.
Despues di e charla, e hobennan tin e oportunidad pa participa den diferente workshops caminda nan por explora topiconan diverso den STEM. Nan lo por scoge e workshopnan cu nan ta interesa den dje, personalisando nan experiencia segun nan interesnan.
Durante e evento, lo tin diferente stands caminda nan por mira y siña di negoshinan local y organisacionnan cu ta envolvi den STEM. Aki nan por puntra preguntanan, haya mas informacion y explora posibilidadnan di carera den e mundu di STEM aki na Aruba.
Tickets pa STEM X Youth Summit ta obtenibel for di dialuna, dia 15 di januari, riba www.stemxaruba.com cu un costo di 50 florin. Cuponan ta limita.
Pa mas informacion y pa registra, bishita www.stemxaruba.com of tuma contacto cu Futura.
Futura ta invita tur hoben interesa den e topiconan di STEM pa registra pa STEM X Youth Summit pa un dia di exploracion, innovacion y inspiracion!