Diasabra 6 di januari anochi, Prome Minister Evelyn Wever-Croes hunto cu Presidente di SMAC, señor Darren van Ommeren, a cende e cecha di Carnaval 70 y asina duna inicio na e temporada di Carnaval pa aña 2024. Prome Minister a representa Minister di Cultura Xiomara Maduro kende a disculpa su mes pa motibo di kebrante di salud.
Aruba por a disfruta di e Parada di Flambeu sea den parada, na banda di caminda of via television y medianan social. Prome Minister ta gradici SMAC, lidernan di gruponan, musiconan, y tur esnan cu ta engrandece e celebracion cultural di mas grandi di nos pais, nos Carnaval.
Carnaval, un temporada cortico, bunita y colorido, unda cu carnavalistanan ta mustra nan creatividad y amor pa nos cultura. Sinemabargo, e temporada aki ta exigi tambe pa cada ciudadano mantene na reglanan di siguridad y sentido comun.
Prome Minister un biaha mas ta encurasha un y tur pa goza di e temporada bunita aki manera ta Aruba so por pero, pa tene cuenta cu otro, specialmente nos muchanan. Siguridad di nos muchanan mester ta na prome luga. Mientras cu adultonan ta disfruta di e ambiente di musica y baile, semper keda cu bista riba e muchanan y asegura cu cada stap cu nan dal, ta rondona di cuido. Preferibel ta pa nan no ta den oranan laat di anochi den e ambiente di Carnaval. Den actividadnan di dia cu solo fuerte, mantene nan hidrata y laga nan come bon y specialmente tambe, cuida nan oido cu earplugs.
Feliz Carnaval 70. Ban crea di cada momento, recuerdonan bunita unda siguridad di un y tur ta prioridad pa cada un di nos. Pabien Aruba.