Sra.Liliana Rasmijn, Vocero di Polis: Tin boet! Ley ta bisa cu no mag tira klapchi despues di 1 di Januari

ORANJESTAD, 4 di Januari 2024: Polis ta pidi atencion pa e prohibicion di tiramento di klapchi despues di 1 di Januari. Vocero di Cuerpo Policial, Liliana Rasmijn, a subraya cu e tradicional tiramento di klapchi despues di e fecha aki ta enfrentando un cambionan serio. Segun e ley, klapchi ta prohibi despues di 1 di Januari y esnan cu ta keda persisti ta enfrenta boet.
Rasmijn a enfatisa cu ta crucial pa cumpli cu e ley, y cu Polis ta dispuesto pa haci cumpli e normanan estableci. El a destaca cu tin un ley cu ta stipula claramente e restriccionnan riba tiramento di klapchi y cu boetnan ta wordo imponi pa esnan no sigui e reglanan.
Pa informa di tiramento di klapchi despues di e fecha stipula, ciudadanonan por yama central di polis y entrega informacion y evidencia si ta posibel. Rasmijn a remarca cu esaki ta un esfuerzo pa reforza e cumplimento di e ley y pa sigura cu klapchi no ta wordo tira ilegalmente.
Adicionalmente, el a yama atencion na e necesidad di actualiza e ley, hisa e boetnan y impone multanan mas halto pa haci nan mas efectivo. Rasmijn a destaca cu aunke e tiramento di klapchi ta un tradicion, mester primordialmente cumpli cu e reglanan estableci.
Den su declaracion, e vocero di Polis a menciona cu tin situacionnan special, unda por otorga un permiso (vergunning) pa tiramento di klapchi despues di e fecha stipula, manera pa casnan di luz. Sinembargo, e ta resalta cu esakinan ta casonan special y cu mester cumpli cu e procedimentonan legal pa obtene e permisonan necesario.
Rasmijn a pidi colaboracion di e comunidad y a pidi atencion pa yama polis inmediatamente si e tiramento di klapchi ta causando molester. Adicionalmente, a adverti cu e boetnan mester wordo cumpli y cu Ministerio Publico ta encarga di determina e suma di e boetnan.
E yamada ta pa actualiza e maneho di e custumber di tiramento di klapchi pa evita consecuencianan no desea.