ORANJESTAD – Pa aclarea cualkier duda den comunidad, Prome Minister Evelyn Wever-Croes a duna un splicacion breve, riba e tereno cu a ser otorga na St Regis pa por construi un hotel na Aruba. Prome Minister a splica cua 2016, tempo cu sra Marisol Lopez-Tromp tabata minister di infrastructura, el a sera un compromiso cu St Regis, cu a indica di ta interesa pa construi un hotel na Aruba, consistiendo di 308 camber.
Na 2017, ex minister di inrastructura, sr Otmar Oduber, mirando cu no por a elimina e acuerdo aki, a tuma e decision pa sinta na mesa cu St Regis pa purba re-negocia e auerdo aki, pa reduci e suma di camber otorga. Despues di hopi negociacion, a logra yega na un acuerdo pa baha e cantidad di camber na 200. Construccion pa cu e hotel aki, a inicia na 2019 y lo dura un par di aña prome cu e hotel por habri su portanan oficialmente.
“E ta importante pa aclarea e dudanan aki den comunidad, y pa pueblo di Aruba ta bon informa di unda cierto decisionnan ta bin. E prioridad di Gabinete Wever-Croes ta pa traha na bienestar di pueblo, y pa comunidad di Aruba ta altanto di tur desaroyo, cu e informacion corecto” Prome Minister a expresa.