Mi anhelo ta di por a cuminsa cu algo positivo mirando cu nos ta na comienso di un aña nobo pa presenta na pueblo, pero ta dificil pa papia bunita, manera nos mandatarionan a bin ta haci den nan mensahenan di fin di aña. Tras di e cortina di e bunita palabranan tin un realidad tristo ta wordo scondi di casonan cu nos por considera alarmante. Pero nos por mira, cu mientras cu gobierno ta hunga wega di Caco Scondi, nos Parlamento ta na soño y pueblo ta esun cu lo sufri e consecuencianan.
Si nos mester kere nos mandatarionan, Aruba lo para bira e Dubai di Caribe. Den su speech di fin di aña nos prome mandatario ta pinta un futuro super briyante cu inversionnan riba diferente tereno, entre nan atencion pa e situacion di e adulto mayor.
Nos flamante minister di medio-ambiente mescos cu e prome mandatario ta exigi spotlight cu proyectonan cu lo nifica un mehoracion di nos flora y fauna. Nos minister di educacion ta señala e empeño di e gobierno pa drecha nos scolnan y e minister encarga cu energia ta caba di buta e cherry riba e bolo. Diripente tin atencion atrobe pa nos refineria unda ta expresa e posibilidad cu e lo por bira un “upgrader”!
Ta obvio cu gobierno ta trata na tur sorto di manera pa evita papia riba e escandalonan cu e ta wordo confronta cu n’e. Na prome lugar nos mester constata cu ningun di e proyectonan lo tin un balor agrega pa e situacion penoso cu un gran cantidad di nos pueblo ta experenciando. Nos grandinan mester sobrevivi cu un aumento marginal di entrada (esaki conforme ley y ningun sorto di fabor), mientras e prijsnan ta sigui aumenta. E meta tras di e atencion pa e grandinan ta obvio. E grupo ta consisti di casi 25% di nos poblacion y tur tin derecho di voto, pues un “target” importante prome cu eleccion.
Si mester kere esnan cu ta traha den Enseñanza, Educacion “ligt op zijn gat”. Docentenan ta expresa nan preocupacion y si haya un oportunidad ta bandona nos isla. Kico realmente a haci pa mehora e situacion: NADA.
Nos minister encarga cu energia diripente tin atencion atrobe pa nos refineria unda ta expresa e posibilidad cu e lo por bira un “upgrader”! Pakico a nombra un familiar como director di RDA? Tabata tin un “open sollicatie procedure”? Ta berdad cu eta strica 30 mil “heldu” pa luna!Con a para cu e MoU firma cu Eagle LNG? Unda e plan pa instala un planta hydrogeno a keda? E ta un Fata Morgana tambe?
Pa awor sin embargo ta e minister di medio-ambiente ta “span de kroon”! Atrobe hues den su sentencia ta bati pisa riba dede di gobierno y e minister den e caso cu Amsterdam Manor a cuminsa pa motibo di e mal holor di Bubaliplas. Awor tambe turistanan a cuminsa ta manifesta nan disgusto cu e holor desagradabel. Y kico e minister ta haci banda di habri e sluis, ta saca mas potret. Pa di tantisimo biaha gobierno a perde casonan encuanto e falta di solucion debido di e dump na Parkietenbos.
Nos por sigui gaba cu tin un desaroyo tremendo di turismo, pero e entrada parce di lo mester wordo usa pa paga NO pa drecha RWZI y dump, pero pa paga e boetnan cuantioso cu hues ta determina. E minister parce no tin mucho preocupacion cu un posibel desaster ecologico si e RWZI disfunciona por completo. Y parlamento ta “MUISSTIL”!
Nos ta contento cu e “Mededingingsautoriteit” a wordo acepta den Parlamento y nos ta spera cu esaki no djis bai fungi como un “window dressing “! Ta di spera cu e autoridad aki realmente bay caba cu e “cartelnan”(prijsafspraken) cu tin y investiga e proyectonan cu ta mustra cu kier wordo hinca den “doofpot”! Aki tin hopi “hushmoney”!
Y nos Parlamento den tur tormenta aki ta den un soño profundo cu no ta ripara cu ta un “botter di awa BASHI” ta presenta na e pueblo cu obviamente tin un sed mortal!
Brazil, 4 di januari 2024
Candelario ‘Booshi’ Wever
Miembro di UPP
Brazil 163