Como un ekipo y na un manera hopi profesional a logra esaki
Relaciona cu e scolnan ganado di e proyecto di Edutech, diaranson 13 di December, Prome Minister Evelyn Wever-Croes a bishita Scol Preparatorio Nos Paraiso cu ta situa na Paradera. E Proyecto aki ta encera 7 flipboards pa asina lesnan por bay na manera digital. Prome Minister a wordo ricibi pa e docentenan y muchanan hopi contento y entusiasma cu e bishita pero sigur tambe cu e flipboards cu lo haci enseñansa na e scol hopi mas bunita y interactivo.
Prome Minister a pasa den cada klas pa comparti cu e muchanan y mira con e muchanan ya caba ta domina e flipboards hopi bon y con hopi nan ta gusta e forma digital aki pa siña, te hasta un mucha e expresa na final “Ay no, les a caba caba”, dunando un sentimento di satisfaccion cu e Proyecto di Edutech ta brindando na scolnan rond di Aruba. “Tanto maestro como e alumnonan ta hopi entusiasma cu nan flipboards. Algo hopi bunita pa mira cu como un ekipo, maestronan ta carga e proyecto, a traha nan proyecto na un forma hopi profecional y a gana y a ehecute den nan klasnan”, Prome Minister a remarca.
Prome Minister a duna di conoce cu cada klas ta ehecuta e Proyecto na nan forma particular, incluyendo hasta lesnan di gymnastiek den klasnan. “Mi ta hopi contento di mira con e Proyecto a wordo ehecuta na Scol Preparatorio Nos Paraiso y mi ta sigur cu e manera digital aki di enseñansa, lo trece hopi benificion pa nos alumnonan”, Prome Minister a expresa.
Prome Minister ta felicita cabesante, cabesante suplemente, na e ekipo di educadornan y alumnonan di Scol Preparatorio Nos Paraiso. “Pabien cu boso a gana e flipboards di e Proyecto di Edutech y danki na henter e ekipo di maestro pa traha hopi duro y logra esaki pa e muchanan di scol preparatorio na Paradera”.
