Caya G.F.Betico Croes – Dialuna anochi algo pasa di 9’or un adicto ambulante lo a yega altura di un kiosk den Centro di Ciudad. E homber tawata sclamando di dolor.
E la conta hende cu e la wordo bati y cu e tin hopi dolor.
Mesora a avisa polis. Na yegada polisnan a haci e adicto algun pregunta, manera kiko a pasa.
E la bisa cu den area aparentemente di Renaissance e la bay drumi den un auto.
Segun su version e tawata tin soño y debi cu e auto tawata habri e la subi aden, sin sa kiko tawata sper’e.
Doño di e auto lo a hay’e y bay over na usa forsa bruto, door di bati’e.
E tawata keha di hopi dolor na su ribchinan parti robes y por a mira cu e la ricibi un golpi fuerte na su wowo drechi, cu tawata “tapa”.
Dado momento e la cuminsa scupi sanger, un posibel indicacion di un golpi duro paden.
Ambulance a wordo solicita y na yegada Paramediconan a cana cu ne te ora e la subi ambulance.
Polis a puntr’e si e lo bay entrega un keho y e la contesta cu si. E persona aki un tempo a yega di representa Aruba den exterior, den coremento.
