Home » Fiscal a exigi 3 aña di prison y 5 aña sin por traha como Polis Agente Vos ta bay cas awe cu menos castigo cu Fiscal a exigi

Fiscal a exigi 3 aña di prison y 5 aña sin por traha como Polis Agente Vos ta bay cas awe cu menos castigo cu Fiscal a exigi

by Admin
0 comment 198 views

ORANJESTAD – Awe henter mainta den Corte di Husticia a dedica na tratamento di e caso penal cu Ministerio Publico a cuminsa contra e agente di Polis, E.Vos (51), kende ta wordo acusa di un serie di delilto.

ARUBA NATIVE por a compronde cu Fiscal a exigi castigo pisa pa Vos pero Hues no ta haya proba e acusacion di forma parti di un organizacion criminal y pesey a baha e castigo. Esey a trece cun’e cu awe tardi Vos ta bay cas.
Den sala di Corte tabata presente ruman homber di Vos y coleganan Polis. Un Hues di Curacao a bin Aruba special pa tratamento di e caso aki.

ACUSACIONNAN CONTRA VOS

Fiscal a bisa Hues cu tin 6 acusacion contra Vos.

– Entre Maart 2018 y 2023, Vos a malversa radionan di Polis,

– a horta radionan di Polis’

– a viola secreto di trabao door di facilita informacion na cierto media y instala aparatonan na su cas,

– a abusa di su funcion como Polis,

– a laga su mes wordo cumpra,

– a forma parti di un organizacion criminal.

VOS A COOPERA CU INVESTIGACION

Hues a mustra cu tin masha hopi documento di un investigacion extenso cu a wordo haci. Tin hendenan a worde scucha na Hues Com. Hues a bisa cu el a ripara cu ora a confronta Vos cu e cosnan, el a coopera cu e investigacion for di principio. Hues ta haya esaki importante pa cu e investigacion. Tambe e ta mustra bon pa Vos su admission. Hues a bisa cu Vos a admiti gran parti pero a spanta di e acusacion cu e ta forma parti di un organizacion criminal.

VOS NA YORAMENTO A SPLICA HUES

Vos a splica Hues cu e tabata hopi concentra den su trabao cu un proyecto “taxi pirate” y e ta haya cu si pasa informacion na cierto media, lo duna bista na comunidad kico tur Polis ta haci. Esaki lo crea confianza bek den comunidad pa cu Polis. Segun Vos, e tabata haya bon reaccion di comunidad. El a bisa Hues cu el a haci esaki no pa haya nada a cambio. El a bisa cu e tabata traha mas pa Polis y no na cas. E tabata kier haya informacion di comunidad y a haya esaki. Tabata hopi ocupa. El a bisa cu henter cuerpo policial ta suministra informacion na prensa. Hues a bisa cu e tin e impresion cu Vos no tabata suministra informacion pa gana placa. Hues a bisa cu e ta compronde cu Vos kier a duna bon imagen con Polis ta traha. Di otro banda di e storia, Vos no ta e promer cu a comparti informacion cu prensa haciendo uso di radio di Polis. Tin varios colega cu a wordo condena. Hues a bisa cu e no por compronde pakico Vos ta bay haci algo asina tog, sabiendo cu e ta castigabel. Door di suministra informacion por a pone bida di Polis na peliger. Vos a bisa cu e sa cu coleganan a wordo condena pero e kier a haya confianza den comunidad pa Polis cual a wordo perdi, pa asina e haya informacion pa e proyecto cu e tabata haci.

DUNA CIERTO MEDIA INFORMACION

Hues a mustra cu na cas di Vos a haya 3 laptops cu tabata conecta cu e radionan di Polis. Riba laptops tabatin programa Zello pa asina pasa informacion pa cierto media. Riba un di e laptopnan tabatin nomber di Giel cu ta un media. Tabatin otro cu riba screen tabatin A.Ponson. Na opinion di Hues, si mira e instalacion, por conclui cu e radionan tabata den un circuito sera pero di e manera ey, tabata pasa tur combersacion riba radio pa cierto media. Hues ta haya cu e radionan a wordo usa pa otro proposito cu realmente nan ta. Via GPS a saca afor cu e instalacion aki tabata operando pa un tempo caba.

HAYA PLACA DI CIERTO MEDIA

Hues a mustra cu tin combersacionnan riba whatsapp cu Vos tabatin cu cierto medio di prensa. Hues a menciona R. Lacle, N. “Speed” de Andrade, N.Giel, cu kende Vos tabatin combersacion amplio. Tambe tin combersacion cu Vos tabata pidi nan placa.

Vos a bisa Hues cu e tabata presta placa y tambe pidi sponsor pa un team cu su yiu ta forma parti di dje.

Hues a bisa cu loke Vos tabata haci, ta crea e impresion cu e tabata haya placa pa pasa informacion. Na opinion di Hues, kico Vos tabata haci cu e placa, no ta importante den e caso aki.

Hues mustra cu tin combersacion cu Brian Koolman riba e instalacion di radio. Vos a bisa Hues cu e tabata suministra informacion na Giel, Lacle y Speed. El a bisa cu Koolman ta traha pa Speed.

ORGANIZACION CRIMINAL

Hues a puntra Fiscal, cu ta acusa Vos di ta forma parti di un organizacion criminal, pero con a para cu Giel, Lacle, Speed y Koolman. Hues a bisa cu esaki ta un acusacion hopi pisa contra Vos cu tin un castigo maximo di 8 aña di prison. Hues bisa cu e acusacion aki no a bay pa e otro agentenan. Fiscal a bisa Hues cu esaki ta un otro contexto. Awor ta trata di un operacion pa un periodo hopi largo. Fiscal a bisa cu e acusacion tin diferente categoria y no ta nada di haci cu organizacion manera mafia.

Vos a remarca cu e otro casonan, e agentenan a coy radio y facilita radio na cierto medionan y nan a keda 10 y 26 dia sera. Nan a haya menos castigo cu Vos. Fiscal a puntra Vos si nan ta menos castigabel cu Vos. Fiscal a mustra cu Vos tabatin instalacion na su cas y tabata facilita cierto merida pa añas contra ley.

TIN DEBE DI 3.9 MIYON

Hues a remarca cu el a nota cu Vos, ademas di ta Polis, e tabata traha seguridad y tin otro companianan. E tin hopi debe y hasta tin situacion cu hende a laga pone beslag riba parti di su salario. Hues ta haya cu esaki ta hopi peligroso pasobra e por crea e situacion cu hendenan ta facilita placa pa cosnan cu no ta bon. Fiscal a bisa cu actualmente Vos debe na instancianan 3.9 miyon florin. A haci investigacion financiero y Fiscal ta bou impresion cu Vos a perde control total riba su situacion financiero.

FISCAL

Fiscal a bisa cu a cuminsa un investigacion riba e motibo cu media prensa ta tur caminda promer cu Polis. Ta sospecha cu media lo tabata scucha radio di Polis. Fiscal a bisa cu tabatin casonan penal den Corte caminda a castiga e agentenan y a kere cu esaki a stop. Sinembargo no ta asina. El a bisa cu dia 16 Maart 2023, Cuerpo Policial a haci denuncia di ladronicia di radionan. A constata cu tabatin 3 radio na un localidad y ta sendi.

MAS CU 9 MIL INFORMACION DI POLIS SCUCHA

Fiscal a mustra cu desde 2018 tres di e radionan tabata na Vos como Polis di bario. Investigacion mustra cu Vos tabata suministra informacion na Lacle, Giel y Andrade. Asina a haci investigacion na cas di Vos y a haya tres laptop instala riba 3 radio riba canal 1, cu ta e canal general di Polis. Tabata usa e programa Zello pa asina manda informacion na cierto media. Ta asina cu 2 di e laptops a wordo desactiva di distancia pa daña investigacion. A logra habri un laptop caminda a haya 9572 informacionnan di Polis manda pa cierto media. A haya un di wifi cu carchi conecta na 24 ora. Fiscal a hasta mencion cu segun declaracion di Vos, Speed lo a ofrece 1500 florin pa haya un radio pero el a nenga. Despues Speed a bolbe ofrece 1500 florin mas pero el a keda nenga. Segun Fiscal, Vos a declara cu dos biaha Koolman a bay su cas pa traha riba e instalacionnan

EXIGENCIA DI FISCAL

Fiscal a bisa cu e ta haya Vos culpabel di tur e acusacionnan.y a exigi 36 luna di prison (3 aña) di cual 8 luna ta condicional cu un tempo di prueba di 3 aña. Fiscal a exigi tambe cu pa 5 aña, Vos no por eherce e trabao di Polis.

DEFENSA

Abogado mr. de Sousa a bisa Hues cu Vos a admiti di a haci malo. E abogado a bisa cu e no ta haya cu por papia di malversacion y horta radio. Na opinion di e abogado, Vos tabatin e radionan na su disposicion.

E abogado a cuestiona e acusacion di organizacion criminal. El a remarca pakico e otronan no ta den Corte. No ta conoci tampoco si Ministerio Publico lo bay persigui nan. E abogado a bisa cu no por papia di un organizacion criminal si no tin otro miembronan di organizacion.

Na opinion di mr. de Sousa, e hecho cu tabata cambia cabel of bateria di e aparatonan, no ta suficiente pa papia di un organizacion criminal. E tres medianan cu tabatin laptop, ta competi cu otro. No por papia di organizacion. E meta di e grupo aki tabata haya informacion y nada criminal.

SENTENCIA

Hues a pospone e caso pa mas o menos 45 minuut y despues a bolbe y dicta sentencia di biaha. Hues a bisa cu e no ta haya legalmente proba cu Vos ta forma parti di un organizacion criminal y a declar’e liber di e acusacion ey. Hues ta haya Vos culpabel di e otro acusacionnan. Hues a condena Vos na 16 luna di prison, di cual 8 luna ta condicional cu un tempo di prueba di 3 aña. Hues a bisa cu e ta prohibi Vos di traha como Polis pa un periodo di 3 aña. E decision aki a haci cu awe atardi mes Vos a haya su libertad.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio