Den cuadro di Educacion cultural, participacion y accesibilidad na arte y cultura, LKCA (Landelijk Kennisinstituut Cultuureducatie en Amateurkunst) hunto cu OCenW (Ministerio di Enseñansa, Cultura y Ciencia di Hulanda) a invita tur miembro di Grupo di Trabou pa Educacion di Cultura y Arte den Reino Hulandes, pa participa na un siman di trabou di orientacion na Hulanda. Ruby Eckmeyer kende ta specialista di cultura na secretariado di UNESCO-Aruba y tambe presidente di e Grupo di Trabou aki, hunto cu Dyantha Maduro, docente di baile na IPA y miembro di Comision Nacional di Cultura y Arte di Aruba, a representa Aruba. FCP (Fonds voor Cultuur Participatie) a subisidia e siman di orientacion aki pa representante di tur e islanan di Caribe Hulandes por a participa.
Na Hulanda e Centro di Conocemiento LKCA tin mas di 20 aña di experiencia trahando tanto cu scol como cu organisacionnan no-Gobernamental (NGO’s) mientras cu LKCA tambe ta forma parti di e Grupo di Trabou di Educacion di Cultura y Arte. LKCA tin como meta pa sostene tur loke ta educacion cultural, participacion na tur loke ta cultura y arte y pa haci organisacionnan cultural y di arte mas accesibel pa publico. E Grupo di Trabou a participa tambe na un conferencia ‘Cultuur met Kwaliteit – CmK’, cu FCP hunto cu LKCA a organisa, pa tur persona
di contacto entre un scol y un organisacion cultural na Hulanda, e asina yama CmK-er. Na e conferencia aki representantenan di Aruba, hunto cu representantenan di Sint Maarten a duna un presentacion. UNESCO-Aruba a duna informacion riba e Programa y Framework di Culture and Arts Education (CAE) di UNESCO. Sint Maarten a duna informacion riba tur loke nan ta haci na Sint Maarten den cuadro di educacion di cultura y arte riba nivel di educacion no-formal.
Na e prome Conferencia Intergubernamental cu UNESCO a organisa na 1998, pa haci un peticion na henter mundo pa formula maneho di cultura pa nan país, UNESCO a pidi tambe pa reconoce cultura y arte como un dimension fundamental di educacion. Na e di dos conferencia MONDIACULT, a haci un peticion na tur pais-miembro pa duna educacion cultural riba nivel di e educacion formal, no-formal y informal. Educacion formal ta tur loke ta tuma luga den scol, educacion no-formal ta loke ta tuma luga pafo di scol organisa pa un instancia of institucion, y educacion informal ta loke ta tuma luga entre otro den famia, na cas, riba caya etc.
Na 2006 y 2010 UNESCO a organisa un Conferencia Mundial di Educacion di Arte y na 2011 UNESCO a proclama un siman den luna di mei como e Siman
Internacional di Educacion di Arte. Actualmente UNESCO ta reformulando e Framework di Educacion di Cultura y Arte (CAE), basa riba varios consulta cu nan a tene rond
mundo. UNESCO-Aruba a participa den e consulta di Region Caribe y e consulta Internacional cu Comisionnan Nacional pa UNESCO.
Riba nivel di Reino Hulandes, desde 2021 e Ministernan di e paisnan Aruba, Corsou, Sint Maarten y Hulanda a forma e Grupo di Trabou pa Educacion di Cultura y Arte (CAE). Regularmente e representante di e 4 paisnan hunto cu e islanan di Boneiro, Saba y Sint Eustatius ta reuni online, pa asina palabra con lo bay traha hunto riba nivel di Educacion di Cultura y Arte den tur e comunidadnan cu ta forma parti di Reino Hulandes. Desaroyo di Educacion di Cultura y Arte ta forma parti importante di e desaroyo di un ser humano, na su bienestar personal y den su bida diario. Pa e motibo aki ta importante pa crea un infrastructura pa Educacion di Cultura y Arte, cu ta duradero pa nos futuro generacionnan.
Representante di e paisnan Aruba, Corsou, Sint Maarten y Hulanda,
hunto cu representante di e islanan Boneiro, Saba y Sint Eustatius
Dyantha Maduro, docente di baile na IPA y Ruby Eckmeyer, specialista di cultura
na Secretariado di UNESCO-Aruba, a representa Aruba na e Conferencia ‘Cultura y Calidad’.