Home » Un total di 11 damas a ricibi nan certificado pa completa e trayecto di formacion social exitosamente

Un total di 11 damas a ricibi nan certificado pa completa e trayecto di formacion social exitosamente

by Admin
0 comment 126 views

ORANJESTAD – Diaranson mainta, a tuma luga na Marinierskazerne, entrega di e certificadonan na e 11 damanan cu a completa e trayecto di Formacion Social, Social Vormings Traject (SVT). Prome Minister Evelyn Wever-Croes tabata presente na e graduacion aki, den nomber di Minister di Husticia Rocco Tjon, pa dirigi palabra na e 11 damanan, y alabes haci entrega di e certificadonan. Durante su discurso, Prome Minister a expresa di ta hopi orguyoso di e damanan aki, pa nan compromiso, dedicacion y sacrificio demostra a lo largo di nan arduo caminda di formacion.

Prome Minister a indica cu e dia aki, ta un testimonio di e determinacion, fortalesa y e curashi cu ta caracterisa e damanan di Formacion Social/ SVT2, kendenan a supera desafíonan y a alcansa metanan extraordinario. Mescos cu nan predecesornan di SVT1, nan a demostra cu e genero no ta un barera pa alcansa exito den un trayecto militar, y cu igualdad di oportunidadnan ta fundamental pa construi un Aruba fuerte y resiliente.

Desde 21 di Augustus 2023, e damanan aki a pasa den 4 luna di formacion semi militar riguroso. Durante e lunanan aki, nan a haña formacion den disciplina, structura, traha den team y traha riba nan metanan personal. Tambe, pa prome biaha nan a participa cu varios training na Corsou, y a haci e “zwem 4 daagse”, y a obtene nan medaya. Cada un di nan a demostra un compromiso excepcional cu balornan fundamental di honor, cu ta principionan cu sigur nan lo hiba cu nan unda cu nan bay.
“Mi ta gradici tur e familiarnan y ser kerinan di e damanan aki, pa nan apoyo incondicional a lo largo di e biahe aki. Gobierno ta reconoce cu tras di cada dama di Formacion Social tin henter un red di persona cu ta brinda amor, comprension y aliento na momentonan difícil. E logro aki ta di cada un di boso mesun hopi cu e ta di nan. Mi ta gradici tambe e team di Formacion Social cu ta consisti di Arumil y Bureau Sociale Vorming, y e team di Corsou pa nan colaboracion y bunita contribucion.

Finalmente, mi ta felicita cada un di e damanan di Formacion Social 2/ SVT2 cu a gradua. Boso ta testimonio bibo di diversidad y capacidad di superacion. Cu e dia aki marca e comienso di un aventura yena cu exito. Nos ta ansioso pa presencia boso contribucion na e bienestar di nos isla”, Prome Minister a expresa.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio