ORANJESTAD – Recien Corte di Husticia di Aruba a dicta sentencia den un caso hopi lamentable. Ta trata aki di un caso caminda ta acusa e homber G. di a abusa di su yiu muher di crianza K., entre 2017 y 2022. A sali na cla cu un mucha ta bay traha trampa pa e pareha di su mama, cu e proposito di kibra e relacion. Na 2017 e mucha K. tabatin 12 aña y actual tin 18 aña.
MUCHA A TRAHA TRAMPA PA PADASTRO
Tratamento di e caso aki a sosode na comienso di November 2023 caminda e homber G. kende ta biba cu e mama di e mucha K., a desmenti categoricamente cu durante e periodo cu e mucha ta bisa, el a abusa di e mucha. G. a bisa Hues cu e mucha K. a traha un trampa p’e y el a cay aden. El a bisa Hues cu un dia so, el a haci actonan inmoral cu e mucha K. y e mucha K. a filma esaki. Esaki a sosode dia 2 December 2022, caminda G. a bay lanta K. for di soño pa e bay school. Door cu K. no kier a lanta, el a hala e klechi y a ripara cu K. tabata full sunu. Esey a conduci cu G. a haci actonan inmoral.
Durante tratamento di e caso Hues a mustra cu na Augustus 2023, e mucha K. a bay na Hues Comisario y a bisa cu e kier papia e berdad. Esaki tabata depues cu su welo, tata di su mama, a fayece. E welo tabata masha pega cu K. Ta parce cu K. no por a wanta mas e gañamento.
Na Hues Comisario, K. a bisa cu el a traha un trampa pa G. pa asina filma y cu tur e otro cosnan cu el a bisa di G. no ta berdad. Hues a expresa cu e ta haya cu ta un cos leu pensa cu K. a haci.
Durante tratamento di e caso, e mama di K., a wordo scucha como testigo den Corte. E mama a bisa cu K. no ta gusta G. y cu K. a bis’e cu e kier kibra nan relacion pa asina G. bay bek Curacao. Segun e mama, K. no tabata accepta G. como tata. E mama a bisa tambe cu K. no ta biba na cas mas sino a bay biba serca un amigo.
FISCAL A EXIGI 6 AÑA DI PRISON
Fiscal ta haya cu pa un vez so cu a filma, ta suficiente prueba di sosten pa demostra cu ta henter e periodo esaki tabata tumando lugar. Fiscal ta haya cu G. a tacha integridad di un mucha kende e ta su padastro. No a tene cuenta cu interes di e mucha y consecuencia cu esaki lo por tin pa e mucha. Fiscal a mustra cu na Hulanda, Corte a condena un homber cu a abusa di su yiu na 6 aña di prison. El a mustra tambe cu recien Corte di Husticia di Aruba a condena un homber na 5 aña y 6 luna di prison pa abuso di mucha. Fiscal a exigi 6 aña di prison pa G.
SENTENCIA
Recien Hues a dicta sentencia den e caso aki, caminda el a bisa cu e no ta haya G. culpabel di e acusacion cu entre 2017 y 2022 el a abusa di e mucha K. Hues a declara G. liber di e acusacion aki. Hues a sigui bisa cu e ta haya G. culpable cu dia 2 December 2022, el a haci actonan inmoral cu su yiu di crianza. Hues a bisa cu no tin ningun prueba cu solamente declaracion di e mucha. E mucha a filma loke a sosode y esey ta prueba di sosten. Hues a bisa tambe cu dilanti Hues Comisario e mucha a declara cu el a gaña cu G. cu a abusa di dje durante un tempo largo.
HOMBER CONDENA NA 1 AÑA DI PRISON
Pa cu e castigo, Hues a bisa cu e ta tene cuenta cu e acusado G. a haci actonan inmoral cu su yiu muher di crianza. Hues ta haya cu G. a tacha e mucha su integridad. Hues a sigui bisa cu experencia ta mustra cu muchanan por keda afecta. Hues ta tuma G. na malo pa loke a sosode. Hues a condena G. na 12 luna di prison, kitando e tempo cu G. ta sera caba den KIA.
E caso aki ta laga hopi hende pensa kico por pasa den un relacion entre un mama cu su yiu(nan) y un homber cu no ta e tata biologico.