San Nicolas, Aruba
E organisacion “Women empOwering Women Aruba” (WOW) a uni nan mes na e meta nacional pa un Aruba limpi dor di contribui na bienestar di nos comunidad cu nan evento di limpiesa na Grapefield Beach, San Nicolas, riba 18 di november, 2023. E evento a conta cu un participacion exitoso di diferente voluntarionan, incluyendo miembronan di organisacionnan Women empOwering Women, Circle K of Colegio E.P.I., Circle K Club University of Aruba y netwerk partner Orthopedagogisch Centrum.
E obhetivo principal di e evento tabata pa realisa un accion di limpiesa riba e playa, contribuyendo na conservacion di nos ambiente y promoviendo un sentido di responsabilidad comunitario. E actividad a uni diferente organisacion y clubnan di servicio, logrando asina un esfuerzo conhunto cu a haci un impacto positivo na e comunidad di San Nicolas.
Tur voluntario a trece nan entusiasmo y dedicacion na e evento, resaltando e unidad y colaboracion cu ta caracteristico di Aruba.
“Nos ta hopi contento cu e participacion amplio di voluntarionan cu a uni nan forsa pa limpia e playa na Grapefield. Esaki ta demostra e poder di colaboracion y nos compromiso pa mantene nos isla limpi y saludabel pa tur,” segun un representante di Women empOwering Women Aruba.
WOW Aruba ta expresa nan gratitud na tur esnan cu a colabora y contribui na e exito di e evento di limpiesa na Grapefield Beach. Un danki special ta bai na COMPRA ARUBA N.V. Ecotech Aruba y DigitalView Media pa nan sosten.
Pa mas informacion tocante e evento por tuma contacto cu Women empOwering Women Aruba via [email protected].