ORANJESTAD – Diabierna ultimo, Minister di Energia Glenbert Croes tabata presente na e “groundbreaking” di e tanki di WEB na Alto Vista. E mandatario a expresa, di ta sumamente contento cu porfin, despues di hopi aña cu el a wordo planifica, a logra inicia cu e proyecto importante aki. E proyecto aki mester a wordo bon prepara, mirando cu no ta facil pa baha un tanki asina importante pa districto di Noord, cu ta cubri un sector pa nos comunidad y economia asina grandi.
Minister Croes ta felicita henter e famia di WEB, cu e gran logro aki. “Como Minister di Energia mi ta duna WEB tur mi apoyo hunto cu Utilities, y deposita tur mi confiansa, den nan profesionalismo, determinacion, y trabou pa inverti den nos comunidad, y mehora asina e infrastructura di produccion y distribucion di awa y di electricidad, cu ta den man di Elmar, pa henter Aruba ” Minister Croes a expresa.
E inversion aki ta uno hopi importante pa pais Aruba, mirando cu e tanki lo bay bira hopi mas grandi, y lo tin mas capacidad. Tambe, e material di cual ta traha e tanki lo ta uno mas duradero, pa asina comunidad por conta riba esaki pa hopi aña.
Minister Croes ta felicita e director nobo di WEB, Alfredo Koolman, den cual Gobierno a pone tur su confiansa, e contratistanan cu a traha duro pa haci e “groundbreaking” aki un realidad, y tur e profesionalnan cu di un of otro manera a yuda cu nan experticio pa por logra yega na inicio di e proyecto aki. Aruba por tin e certesa, cu lo bay bin un tanki nobo na Alto Vista cu lo ta digno di e satisfaccion y confiansa di henter di comunidad. Aruba merece un infrastructura bunita pa complementa e beyesa di e pais.
“Como Minister di Energia mi a y ta pone mi confiansa y apoyo total den e ehecucion di e vision y plan di inversion den e Infrastructura di WEB full rond di Aruba cu nos Gobierno ta para p’e. WEB ta carga e desaroyo di nos comunidad y di nos cconomia: PABIEN WEB Y PABIEN ARUBA” Minister Croes a expresa.