Home » Hof ta declara e dama Winterdaal liber y ta condena e homber Cabrera Baez na 14 aña di prison pa a mate Angela na Zeewijk

Hof ta declara e dama Winterdaal liber y ta condena e homber Cabrera Baez na 14 aña di prison pa a mate Angela na Zeewijk

by Admin
0 comment 201 views

ORANJESTAD – Hof di Corte Superior Dialuna merdia a dicta sentencia den e apelacion di Walkidia Winterdaal (35) di Santo Domingo y e homber Jafet Cabrera Baez (24) contra nan castigo di 18 aña di prison pa asesinato di Frans Angela (79) riba e anochi di 17 pa 18 Maart 2022.

ARUBA NATIVE por a compronde cu Procurador General a haya e pareha culpabel di asesinato cruel y a exigi pa subi e castigonan na 22 aña di prison pa Winterdaal y 25 aña di prison pa Cabrera Baez. Hof su decision ta cu Winterdaal ta wordo declara liber y 14 aña pa Cabrera Baez.
PG A EXIGI HOPI MAS CASTIGO

Den e sentencia por compronde cu dia di tratamento di e caso, 7 November 2023, Procurador General di Ministerio Publico (PG) ta haya e pareha culpabel di asesinato cruel di Angela riba e anochi di 17 pa 18 Maart 2022 y a exigi 22 aña di prison pa Winterdaal y 25 aña di prison pa Cabrera Baez.

EVALUACION DI HOF

Hof den su evaluacion di e caso ta mustra cu riba e anochi di 17 pa 18 Maart 2022, Cabrera Baez a kita bida di Angela. Ta asina cu e pareha Winterdaal y Cabrera Baez a pidi Angela un lift pa San Nicolas. Winterdaal a sinta dilanti banda di Angela mientras cu Cabrera Baez a sinta patras. Na dado momento Cabrera Baez a perde cabez y a gara Angela na su cabez y bira esaki cu forza tur banda. Esaki a causa cu e nek di Angela a kibra. Despues e pareha a saca e curpa for di e auto y a pasa auto riba dje diferente biaha. A pasa auto riba su cabez y curpa parti ariba.

NO CULPABEL DI ASESINATO

Hof ta haya cu no por bisa cu Cabrera Baez a asesina e victima Angela. Tampoco cu intencional a mat’e. Hof a declara Cabrera Baez liber di tur dos acusacion.

Hof ta mustra cu Cabrera Baez, hunto cu su pareha Winterdaal a pidi un lift y a bay den auto di Angela, direccion San Nicolas. Winterdaal a sinta dilanti banda Angela y Cabrera Baez a sinta patras. Segun Cabrera Baez, Angela tabata papia na un manera grocero cu Winterdaal y na dado momento hasta a pone su man riba pia di Winterdaal. Esey a pone Cabrera Baez rabia asina hopi cu el a perde cabez. Cabrera Baez a gara Angela na su cabez y cuminsa drei cu forza den tur banda.

Winterdaal, na estado, tabata teme pa su mes y e baby. El a baha for di e auto y core bay. Despues di un rato e ta mira Cabrera Baez ta bin su direccion den e auto di e victima. El a subi den e auto y constata cu e victima tabata sin bida. Hunto nan a hiba e curpa banda di santana na Zeewijk. Ora di bay for di banda di e santana, Cabrera Baez a pasa cu e auto riba e victima.

Hof ta haya cu aki no por papia di asesinato pasobra Cabrera Baez no a pensa, si e ta bay mata of no e victima. Hof no ta haya cu dia 17 Maart 2022, Cabrera Baez y Winterdaal a subi den e auto di e victima Angela cu intencion di mat’e. Hof a mustra cu Cabrera Baez, na un momento a bisa Polis, cu e y su pareha tabatin e plan pa mata. Hof ta haya cu no tin siguranza cu ta asina y na ki momento Cabrera Baez realmente tabata kier a mata e victima.

Hof ta remarca cu Polis no a sigui interoga Cabrera Baez riba e parti di mata, door di cual e unico biaha cu Jafet a bisa esaki no ta duna suficiente indicacion con e matamento mester a sosode.

JAFET A PERDE CABEZ Y MATA E VICTIMA

Hof ta mustra cu e hecho cu e pareha a pidi e victima un lift, no por conclui cu nan tabatin un plan. Hof ta kere cu Cabrera Baez na dado momento a perde cabez, manera e mes a declara durante tratamento di e caso. Cabrera Baez a bisa Hof cu el a parde cabez ora el a mira cu e victima ta mishi cu su pareha na su pia.

NO CULPABEL DI MATA INTENCIONAL

Hof tampoco ta haya Cabrera Baez culpabel di a mata intencional. Na opinion di Hof, no a keda demostra cu e victima a fayece promer cu un asalto a sosode. Hof no ta haya cu Winterdaal a yuda den e asalto. Hof a mustra cu durante tratamento di e caso, Winterdaal a bisa cu ta berdad cu el a bisa Polis cu el a puntra Cabrera Baez si ta bay pasa auto riba e victima pa ta sigur cu e ta morto. Winterdaal a splica Hof cu el a bisa Polis cu tur loke Cabrera Baez a bisa ta berdad. Esaki pasobra e stima Cabrera Baez y asina yuda Polis. Pero ningun momento el a bisa pa pasa e auto riba e victima. Esey na opinion di Hof no kiermen cu ta Winterdaal a bisa pa pasa e auto. Hof ta haya cu Cabrera Baez ta culpabel pa a mata.

CASTIGO

Pa cu e castigo, Hof a bisa cu e ta tene cuenta cu na un forma horoso a mata e victima Angela (79). Hof a bisa cu Cabrera Baez a causa sufrimento irreparable na e famia di Angela. Ademas e lamentable incidente aki a sacudi henter comunidad.

Hof tambe a tene cuenta cu e raport di psychiater cu ta bisa cu door di e problema mental di Cabrera Baez, e ta menos responsabel pa su actonan.

Hof a conclui cu Winterdaal ta wordo declara liber di tur acusacion y cu Cabrera Baez ta wordo condena na 14 aña di prison. E daño material ta keda 1854,63 Florin. Hof a stipula e medida di pago cu ta nifica cu Jafet mester paga Ministerio Publico y Ministerio Publico lo facilita e placa na e famia.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio