Durante e ceremonia a presenta un plan di restructuracion cu ta brinda paz y trankilidad na e bishitantenan.
ORANJESTAD: Diamars ultimo, Minister di Enseñansa y Deporte Endy Croes hunto cu colega Prome Minister Evelyn Wever-Croes, Vice Prome Minister Ursell Arends, Minister Dangui Oduber, Minister Xiomara Maduro, Presidente di Parlamento mr. Edgard Vrolijk, representante di Monumenten Bureau Aruba y demas invitadonan a asisti na e acto di seyo oficial di Kapel di Alto Vista como prome monumento priva y protegi. Ademas, a tene un Santo Sacrificio di misa efectua pa Monseigneur L.A. Secco. Tambe durante e ceremonia, a presenta un plan di embeyecemento pa e area di Kapel di Alto Vista. Actualmente, e proyecto ta den su prome fase di restructuracion. E meta di e proyecto aki ta pa mantene e area cu paz y trankilidad pa tur esnan cu ta bishita Kapel di Alto Vista pa haci oracion. Minister Endy Croes ta felicita colega Dangui Oduber, Minister Xiomara Maduro y tur stakeholder pa e bunita proyecto di embeycemento aki cu ta brinda paz y trankilidad na e bishitantenan.