E stadion grandi aki ta di University of South Carolina, den cual Minister Endy Croes a caba di firma un acuerdo beneficioso pa nos studiantenan di Aruba.
ORANJESTAD: Durante biaha di trabou na Merca, Minister di Enseñansa y Deporte Endy Croes a haya un invitacion special di University of South Carolina pa wak e wega di futbol Americano, unda cu nan ekipo South Carolina Gamecocks a enfrenta e ekipo di Kentucky den Williams-Brice Stadium. E ticketnan di entrada tabata “sold out”. Rond di 77 mil persona den e stadion pa wak e wega importante aki. Un rato prome cu e wega, e team di University of South Carolina a logra haya un luga pa Minister Endy Croes y su team. E stadion grandi aki ta di University of South Carolina, den cual recientemente Minister Endy Croes a firma un acuerdo beneficioso pa nos studiantenan di Aruba. Cu e acuerdo aki ta brinda ocho (8) of dies (10) studiante e oportunidad pa haci nan Master’s Degree den Sport & Event Management. Minister Endy Croes a expresa cu e MoU cu a firma cu University of South Carolina lo trece hopi beneficio pa deporte di Aruba den su totalidad. E studiantenan aki despues por regresa Aruba cu nan expertisio pa contribui den e desaroyo di deporte. Pa finalisa, e mandatario di Deporte a expresa di ta un honor pa por presencia e wega importante aki y a desea e ekipo di South Carolina hopi exito.