Home » Prome Minister Evelyn Wever-Croes: UN CANTIDAD GRANDI DI MUCHA TABATA WARDANDO PA DUNA SINTERKLAAS Y SU PIETNAN UN BON BINI NA ARUBA

Prome Minister Evelyn Wever-Croes: UN CANTIDAD GRANDI DI MUCHA TABATA WARDANDO PA DUNA SINTERKLAAS Y SU PIETNAN UN BON BINI NA ARUBA

by Admin
0 comment 146 views

 

 

Den cuadro di e celebracion di Sinterklaas y su Pietnan

 

 

ORANJESTAD – Diadomingo atardi, un cantidad grandi di persona tabata presente na e waf di Aruba Ports Authority (APA), pa asina saluda Sinterklaas y su Pietnan na nan yegada na Aruba. Despues di a baha di e barco y saluda tur e muchanan presente, Sinterklaas y su 85 Pietnan a bay den un parada, direccion Renaissance Marketplace, na unda a organsa diferente show, y actividad pa tur e muchanan. 

 

E parada tabata uno cu hopi ambiente, y a wordo anima pa Tanchi Esmee. Dilanti tabata tin Massive Brassband pa inicia e comienso di un di e temporadanan mas dushi pa nos muchanan. Tambe, pa trece  mas ambiente na e parada, tabata tin Xenon y Casper cu a presenta nan cancionnan, Gucci Dancers cu a bin cu nan bailadonan, y un trailer cu cantantenan di Pitbull singing Production, cu ta celebrando nan di 10 aniversario, acompaña pa e bailadonan di The Chaz Modeling and Talent School, cu ta celebrando nan di 25 aniversario. 

 

Prome Minister Evelyn Wever-Croes tabata para dilanti bestuurskantoor, pa asina por a presencia e bunita parada, y na unda, e tabata tin e oportunidad di comparti e dia special aki cu tur e muchanan para eybanda. Prome Minister a expresa, cu e bunita tradicion aki, semper a wordo celebra den grandi, y por nota esaki, mirando e cantidad di hende cu tabata ansiosamente para na banda, pa por duna Sinterklaas y su Pietnan un bon bini. E tabata un momento hopi special pa wak e alegria riba cara di e muchanan, na momento cu Sinterklaas y e Pietnan tabata asercando, y pa a wak cuanto mayor ta duna sosten na e tradicion aki, treciendo nan yiunan pa celebra e yegada di Sinterklaas y su Pietnan. 

 

Prome Minister ta gradici Minister Xiomara Maduro, pa semper duna sosten na cultura di Aruba, Departamento di Cultura, Aruba Ports Authority, DOW, Polis, y Crisis Management Office, pa a organisa un actividad asina exitoso pa e muchanan. “Boso dedicacion, esfuerso y amor pa cumpli cu e tradicion special aki, ta altamente aprecia” Prome Minister a expresa. 

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio