“Ta finalisando e ley pa asina hancra e proyecto aki tambe legalmente y garantisa e transparencia den maneho di companianan estatal
Diahuebs 16 di November, Prome Minister Evelyn Wever-Croes hunto cu Minister Ursell Arends a reuni cu Comision Corporate Governance cu ta cay bou di liderazgo di señor Jossy Lacle. Durante Gabinete Wever-Croes 1, Prome Minister a institui e comision aki pa asina nan yuda Gobierno prepara e ley y procesonan den cuadro di Corporate Governance.
Corporate Governance ta e maneho cu ta wordo hiba pa e companianan estatal y tambe e institutonan cu ta ricibi subsidio di Gobierno. Gabinete Wever-Croes ta finalisando e ley cu mester prepara pa asina hancra e proyecto aki tambe legalmente y garantisa e transparencia den maneho di companianan estatal.
Comsion Corporate Governance, desde su institucion a haci hopi trabou entre otro, a haci varios estudio pa haya miho comprendemento con companianan estatal ta wordo maneha; con Gobierno ta maneha nombracionnan cu mester tuma luga den huntanan di comisario; y a bin cu proposicionnan pa trece cambio pa tin mas transparencia y integridad den e procesonan aki.
“Durante e reunion, e comision a duna un resumen di e trabounan andando y a presenta tur preocupacion y inkietud. Mi ta gradici y felicita Minister Ursell Arends pa tuma e liderazgo di e proyecto aki over den Gabinete Wever-Croes II y pa e trabounan importante cu ta wordo desplega. Gobierno di Aruba ta reconfirma su compromiso pa e ley di Corporate Governance keda cla pronto pa asina tin reglanan cu ta aplicabel tanto pa Gobierno como pa esnan den sector semi publico pa loke ta trata e maneho di e instancianan aki”, Prome Minister Evelyn Wever-Croes a expresa.