Home » Parlamentario Ricky Hoek (MEP): Forsa, curashi y valor ta determina e hende homber

Parlamentario Ricky Hoek (MEP): Forsa, curashi y valor ta determina e hende homber

Di 10 aniversario di Fundacion Hende Homber y Dia Internacional di hende homber

by Admin
0 comment 305 views

 

 

 

ORANJESTAD, Aruba, 17 November 2023: Forsa, curashi y balor ta determina e hende homber. Luna di november ta importante pa e ser masculino ya cu e ta uni diferente evento cu ta importante pa e hende homber. 

 

Asina nos conoce e movimento ‘Movember’ cu mundialmente ta uza e luna di november pa recauda fondo pa salud di e hende homber. Dia 19 di november ta Dia Internacional di Hende Homber y dia 20 di november ta Dia Internacional di Derecho di Mucha. Cu asina ta forma 48 ora di celebracion pa hende homber y muchanan, y e relacion special cu nan ta comparti. 

 

Dia Internacional di Hende Homber

Diadomingo awor, 19 di november cu ta Dia Internacional di Hende Homber, mundo henter lo ta celebrando e balor positivo di e hende hombernan. Ta importante pa pone enfasis riba e ‘role model’ masculino positivo y asina crea consciencia riba e bienestar di nos hende hombernan. Pasobra, awendia e hende homber ta bibando bou di hopi exigencia y presion externo di entre otro trabou, famia, amigonan y medionan social. Nos mester sostene nan. 

 

Tin tres forma den cual por yuda fortalece e hende homber. Di prome, encurasha e hende homber comun y coriente cu tur dia ta traha duro y ta hiba un bida decente y honesto. Di dos, celebra e contribucionnan positivo di e hende homber na comunidad, famia, hogar, cuido di nan yiunan y medio ambiente. Di tres, enfoca riba e salud y bienestar di e hende homber, tanto den e aspecto social, emocional, fisico y spiritual.

 

Conferencia organisa pa Fundacion Hende Homber

Pa ilustra cu esaki ta sosode na Aruba y pa pone nos role modelnan masculino den e lus positivo, Parlamentario Ricky Hoek kier a enfoca riba e conferencia exitoso di Fundacion Hende Homber na cual e a participa. Fundacion Hende Homber a presenta un conferencia titula “Hombernan cu ta marca e diferencia”, cu e enfoke riba e “bienestar emocional y mental”. Un elenco profesional local consistiendo di seis hende homber y un hende muhe a comparti informacion hopi valioso y importante pa e funcionamento optimal di cada ser masculino. Asina a duna informacion riba entre otro tereno psicologico, social-emocional, finansas, spiritualidad, salud y intimidad. 

 

E conferencia a mustra cu hende hombernan na Aruba mester di mas empoderamento, sosten y ayudo pa e retonan cu nan ta enfrenta diariamente. No obstante cu e conferencia tabata dirigi riba e hende homber, e hende muhe tambe ta hunga un papel importante den e bida y desaroyo di e hende homber. Y asina tur esnan presente por a cera conoci cu e profesionalnan cu lo por brinda ayudo y conseho caminda cu ta necesario. Un relacion sano ta hiba na un bida sano. 

 

Finalmente Parlamentario Hoek kier a felicita Fundacion Hende Homber, tanto su directiva como su clientenan, miembronan cu nan di 10 aniversario di existencia. Y gradiciendo na tur cu a contribui y haci e conferencia un exito rotundo. 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio