ORANJESTAD – Diahuebs mainta, Prome Minister Evelyn Wever-Croes a bishita Colegio Laura Wernet Paskel, pa asina mira con e inversionnan di e proyecto cu nan a gana di Edutech ta wordo uza. Prome Minister a expresa di a keda sumamente impresiona di mira con e muchanan di zesde klas ta haci uzo di e 25 chromebooksnan cu nan a haya. Ya caba nan a logra haci nan prome spreekbeurt riba topiconan hopi interesante, na unda cu nan mes a prepare, y a busca e informacion cu nan tabata tin mester. Esaki sigur ta un muestra cu e materialnan aki ta duna nan e posbilidad pa nan sigui traha riba loke ta interesa nan.
Tambe, Prome Minister tabata tin e oportunidad di bishita e muchanan di derde klas, y a mira e
enthusiasmo di cada un di nan, y di nan docente, pa traha cu e 25 tabletsnan cu nan a gana. Sigur un sentimento di satisfacion pa wak cu e proyecto aki ta dunando su fruto pa loke ta educacion di e muchanan. Por ultimo, Prome Minister tambe a aprecia, con e muchanan di eerste, tweede, y Prisma Klas, ta traha cu e 4 digiboardsnan cu nan a haya. E enthusiasmo di e muchanan pa haya les, y di e docentenan pa duna les ta grandi, y ta algo cu Gobierno lo desea di wak den tur scol.
Prome Minister ta felicita cabezante di scol, juffrouw Eta Geerman y ful e staff di Colegio Laura Wernet Paskel pa tur loke nan a haci, pa mehora tur loke nan por a mehora, na infrastructura y digitalisacion. Pero lo mas principal ta di wak con contento, enthusiasma y agradecido e muchanan ta cu e materialnan nobo aki.
Na su turno, cabezante di scol, juffrouw Eta Geerman a expresa di ta contento cu e bishita di Prome Minister, pa asina por mustre tur loke e scol a haya, y con importante e materialnan aki ta pa enseñansa. Tambe el a gradici Futura, pa bin cu un proyecto asina importante, dunando posibilidad na e scolnan pa haya e materialnan digital cu nan mester. El a splica cu e materialnan aki, tin e muchanan mas motiva, y pa e docentenan, nan ta haci e dunamento di les mas placentero. Tambe el a indica cu e satisfacion pa wak e muchanan asina ta grandi, y cu nan ta contento di por mustra Prome Minister y Futura, con bon nan ta uza tur loke nan a haya. Juffrouw Eta ta gradici Gobierno di Aruba, y Futura, y ta spera cu e proyecto aki sigui pa hopi aña mas, pa asina por yuda mas scol. Tambe e ta conseha tur scol pa inverti nan tempo den e proyecto aki pa asina nan tambe por haya e materialnan necesario, elevando asina e nivel di duna y haya les