ORANJESTAD: E biahe di trabou di Minister Endy Croes a continua diaranson mainta, unda cu e dignatario a haci un bishita oficial na University of Maryland Baltimore County (UMBC), Merca. Parti mainta, Mandatario di Enseñansa acompaña pa Minister Plenipotenciario Sra. Joselin Croes y directora di Colegio EPI Sra. Ankie Danker a reuni cu e staf y dr. Antonio Moreira di UMBC University. Durante e encuentro aki a trata, entre otro, e posibilidadnan pa “In-state tuition”, colaboracion di programa di intercambio pa alumno y docente y programa di investigacion riba temanan di interes pa Aruba. Mester agrega cu UMBC University tin un programa atletico hopi amplio den e prome division. Tambe, ta explorando e posibilidad pa nos studiantenan haci nan “Associate Degree” na Aruba via Colegio EPI y despues por continua na e UMBC University pa den 2 aña obtene nan “Bachelor’s Degree”. E conocido sistema 2+2. Adicionalmente, Minister Endy Croes a informa cu a yega na un acuerdo cu Montgomery College, unda cu EPI den futuro ta bay duna un “Associate Degree” cuminsando cu ICT. Como cu UMBC University tin un acuerdo cu Montgomery College, ta facilita e trabou pa por logra esaki. Despues di e encuentro ameno, Minister Endy Croes a haci un recorido di e campus y universdidad cu ta number un (1) den diferente tecnologia na Merca. Pues, pronto den e prome kwartaal di aña 2024 lo anucia e avance di loke cu a logra, den cual sigur lo habri posibilidadnan nobo pa nos studiantenan. Sr. Antonio Moreira, kende ta “Vice Provost for Academic Affairs” di UMBC University a indica cu e universidad ta relitavamente nobo y a wordo funda na aña 1966. Actualmente, nan tin alrededor di 14 mil studiante, 11 mil “undergraduate” y mas di 3 mil studiante di Masters y PhD. UMBC University ta enfoca den programanan cu ta clave pa e pais y necesario mundialmente, den area di ciencia y ingenieria, tecnologia, medio ambiente y atencion medico. UMBC University ta prepara su studiantenan pa ta ciudadano competente y pa marca un diferencia mientras cu nan ta eherciendo nan estudio eynan. Sr. Moreira a expresa cu nan ta contento di ricibi bishita di Minister Endy Croes, Minister Plenipotenciario na Washington D.C. Sra. Joselin Croes y directora general di Colegio EPI Sra. Ankie Danker. Durante e reunion nan a dialoga tocante intercambio di studiante di Universidad di Aruba y UMBC University, buscando pa desaroya programa cu por contribui den e areanan unda tin necesidad. Sr. Moreira a indica cu tin diferente programa cu lo ta beneficioso pa tanto Aruba, como UMBC University y ta contento di por traha den colaboracion cu Aruba y hunto marca un diferencia den e region y mundo. Pa conclui, Minister Endy Croes a expresa cu e ta hopi contento y pronto e colaboracion y cooperacion cu UMBC University lo ta concretisa a traves di un MoU. “Nos ta sigui traha cu amor y pasion pa crea oportunidad di estudio na nos studiantenan local y pa Pais Aruba, habriendo porta pa nos studiantenan di Aruba”, Minister Endy Croes a indica.