Ariba 9 di november ultimo Fundacion Telefon pa Hubentud Aruba a revela su logo nobo. Despues di 24 aña Fundacion Telefon pa Hubentud Aruba/ 131 ta cambia di logo. Agradiciedo na e represantacion cu e logo existente a haci pa nos organisacion durante 24 aña, nos ta tuma despedida di dje. Mirando tur e servicionan nobo cu nos organisacion ta dunando y cu den futuro cercano lo bin acerca, y asina aki prepara nos organisacion pa e siguiente 25 aña. Nos a duna e mucha/ hoben di Aruba e oportunidad durante un competencia di pintura pa yuda nos yega na nos logo nobo. Un diseñador profesional a ahuste e pintura ganador overall den un formato profesional.
E grupo di meta di e servicionan di 131 ta mucha, hoben y adolecente di 8 pa 24 aña. Banda di e grupo meta 131 ta traha cu diferente partner. Un di e partnernan mas importante di 131 ta e mayornan. Mescos cu 131 ta informa su grupo di meta, e partnernan y sigur e mayornan tambe mester wordo informa.
Pa por informa mayornan tocante di e logo nobo, y den cuadro di e celebracion di 24 aña di Fundacion Telefon pa Hubentud Aruba y celebracion di dia nacional y Internacional di derecho di mucha, ariba 20 di november e rotondenan na Aruba lo tin e bandera cu e logo nobo di 131. E banderanan lo ser poni di 20 te cu 27 di november. Asina aki famia completo por tira un bista mas di cerca di e logo nobo di 131.
Pa por a yega na tur e banderanan pa cada rotonde na Aruba, RBC Royal Bank (Aruba) a sostene 131 den esaki. RBC Royal Bank (Aruba) ta kere firmemente den derecho di nos muchanan y ta sostene iniciativanan cu ta salvaguardia esaki.
Tambe nos kier a gradici nos partnersnan cu ta tuma nan impacto social hopi serio y ta inverti den e muchanan y hobenan. Un gradicimento ta bay na Setar N.V., Aruba Airport Authority N.V., Web Aruba N.V., The Salamander Group, RBC Royal Bank (Aruba), Watty Vos BLVD, Green Corridor Aruba, DOW, Albo Aruba General Contractors, The Movies Aruba, Telearuba y Media di Aruba.
Pa mas informacion tocante e logo di 131 por tuma contacto via nos website: 131.aw, Instagram: Instagram: 131aruba, facebook: https://www.facebook.com/telefon.hubentud/, email: [email protected] of telefon 5886138/ 5884011.