Home » DURANTE E ANOCHI DI PREMIO EXCELENCIA DEN DEPORTE, A RECONOCE BALUARTE DEN DEPORTE 2022, SRA. MARLIN “MAYENS” TROMP PA SU GRAN TRAYECTORIO

DURANTE E ANOCHI DI PREMIO EXCELENCIA DEN DEPORTE, A RECONOCE BALUARTE DEN DEPORTE 2022, SRA. MARLIN “MAYENS” TROMP PA SU GRAN TRAYECTORIO

by Admin
0 comment 250 views

ORANJESTAD: Diabierna ultimo, Minister di Enseñansa y Deporte Endy Croes a reconoce y duna homenahe na algun baluarte den deporte di Aruba. Esaki a tuma luga na e ceremonia di Premio Excelencia den Deporte 2022 na Renaissance Convention Center. Sra. Marlin Marlene Tromp, miho conoci como Mayens a ricibi un reconocemento como baluarte den deporte di Minister Endy Croes. Desde chikito Mayens tabata practica deporte hunto cu su ruman- y mayornan. Ful e famia tabata practica deporte. Mayens a forma parti di directiva di Aruba Dolphins, despues di Arubaanse Zwembond y te cu awe den directiva di Aruba Aquatics Federation. Mayens a forma parti di comision tecnico di Centro Americano di Natacion del Caribe (CCCAN). Mayens a sigui diferente clinica di basico, avansa, nivel 1 y nivel 2 di “officiating” pa e deporte di landamento. Tambe, a atende diferente seminario cu ta wordo duna pa tur oficial certifica di Fédération Internationale de Natation (FINA) y cu awo ta World Aquatics. Cu tur esaki den man, Mayens ta pa hopi aña un hurado di FINA Certifica, referee y starter cu por fungi como oficial na tur competencia local- y internationalmente. Tambe Mayens ta UANA starter cu awe ta PanAm Aquatics, esaki ta hurado certifica pa e continente di America. Mayens a traha na competencianan di CCCAN cu ta tur isla di Caribe di habla Spaño, Ingles, Frances y Hulandes, tur pais di America Central y paisnan di Sur America cu tin su costa na lama Caribe. Tambe na e competencianan di Caribbean Free Trade Association (CARIFTA) y Confederación Sudamericana de Natación (CONSANAT). Esey ta pone cu Mayens tin un trayectorio largo como un hurado di landamento. Esaki a pone cu Mayens a wordo nomina pa traha como oficial na Abu Dhabi na World Championship y Junior World Championship na Israël. E isla- y paisnan unda Mayens a traha como hues ta: Jamaica, Barbados, Trinidad & Tobago, Argentina, Hulanda, Merca, Abu Dhabi, Israël etc. etc. Mayens ta carga e cuerpo di oficial di Aruba pa varios aña y ta acerca personanan cu tin e interes pa forma parti di e famia di oficial of tur cu tin interes pa esaki ta bonbini. Hunto ta carga y contribui pa e desaroyo di e deporte di landamento competitivo. Minister Endy Croes ta felicita Mayens pa su gran trayectoria y ta gradicie pa contribui enormemente den deporte di Aruba. Aruba ta orguyoso di bo Mayens!

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio