Un proposicion innovativo pa e debe di Aruba cu Hulanda a keda presenta awe den het Torentje na momento cu e Lider di Oposicion mr. Mike Eman y Promer Minister Mark Rutte a sostene un reunion.
“Den promer instante nos a encontra otro como amigo cu a conoce otro hopi anja y na mes momento a sostene reunión riba temanan importante cu e ex Promer Minister Mike Eman a presenta”, tabata e promer palabranan di Promer Minister Rutte ora e a sali hunto cu Líder di Oposición, mr. Mike Eman pa duna un relato na prensa di e reunión cu nan a caba di sostene den het Torentje.
Promer Minister Rutte a menciona dos tema importante cu Eman a presenta, esta e necesidad pa conecta e desaroyo económico na e desaroyo social. Rutte a agrega na esaki cu Hulanda tambe ta den busqueda di conceptonan pa conecta e economia mas na e aspectonan social y ta compronde e deseo di Eman. Tambe e Promer Minister di Hulanda a mustra riba otro punto hopi importante cu a keda presenta pa Eman, esta con ta bai atende cu e tema di cu debe cu Aruba tin cu Hulanda. A pesar cu Gabinete Rutte ta demisionario Eman ta concidera importante pa e proposicion cu e a haci cuminsa cana e caminda cu un gobierno demisionario ta haya apropia, pendiente di un gobierno nobo.
MODELO CABO VERDE-PORTUGAL
INVESTMENT FUND
E modelo di solucion cu Eman a propone na Rutte a worde inspira pa e areglo cu Portugal y Cabo Verde a acorda algun luna atrás. Cabo Verde mescos cu Aruba a fia placa di Portugal durante e periodo di COVID. Envez di cobra e placa bek of exonera e debe a cana un caminda intermedio cu ta responsabel y na e mes momento na beneficio di e desaroyo duradero di Cabo Verde. E solucion di Cabo Verde-Portugal ta cu e pagonan di Cabo Verde lo bai den un Fondo pa inverti den un desaroyo sostenibel pa Cabo Verde.
Eman ta splica cu promer cu a bin Hulanda a reuni cu Aruba Investment Bank caminda e fraccion di AVP a presenta un nota cu un solucion similar. A consulta cu AIB riba nan pensamento di un Investment Fund ya cu nan a maneha cu éxito e Fondo di Inversion FDA, cu tabata un acuerdo di Aruba y Hulanda di tempo di Gabinete Henny Eman III. Na final di e periodo di FDA e propio Hulanda a haci un estudio di con e fondo a worde maneha y a yega na conclusion hopi positivo.
SOLUCION ALTERNATIVA
DECISION NA E DISCRICION DI UN GOBIERNO NOBO
Den e reunion cu Rutte e nota aki di fraccion di AVP a worde presenta pa Eman y cu un splicacion cu un acuerdo asina lo ta hopi positivo pa ambos Pais, pasobra inversion ta keda un nececidad grandi pa Aruba. Un fondo financia for di propio pagonan di Aruba cu lo mester a bai Hulanda lo worde deposita den un fondo maneha pa Aruba y Hulanda cu lo worde destina pa desaroyo di Aruba. E temanan cu lo worde financia for di un investment fondo asina pa Aruba lo keda acorda tambe entre e paisnan. Eman a menciona entre otro Ensenjanza, Desaroyo Social, Innovacion, Desaroyo Duradero y Renovacion di Barionan y Infrastructura. Pero esakinan ta temanan pa keda analysa ainda, pero den todo caso si por yega na un palabracion asina cu Hulanda e pagonan di Aruba pa e debe cu Hulanda di e forma aki lo keda pa inverti na Aruba.