ORANJESTAD: Siman pasa, Minister Endy Croes a reuni Sr. Randolph Oduber un ex beisbolista profesional di Aruba. Alabes Sr. Oduber ta miembro di directiva di World Baseball and Softball Confederation (WBSC) y ta representa e atletanan masculino. Sr. Oduber ta bek na Aruba y tin su propio “batting cage”. Tambe, Sr. Oduber ta entrena e hobennan, traspasando asina su experencia pa e proximo generacion. Sr. Oduber ta un hoben hopi positivo y talentoso. Por cierto algun siman atras Sr. Oduber a regresa di Taiwan cu e ekipo di Hulanda U18 cu a haci un bon papel den e prome ronde di e torneo di U18 WBSC Baseball World Cup. Durante e encuentro, Minister Endy Croes a comparti cu Sr. Oduber su vision pa cu baseball en general na Aruba. Tambe, a trata e programanan di baseball cu ta fit den cuadro di vision di Gabinete Wever – Croes II. Sr. Oduber a comparti su idea- y consehonan cu e Mandatario di Deporte. A hiba combersacion riba tur nivel di baseball local y kico por haci pa nos peloteronan por etala pa e nivel mas halto y haya oportunidad den exterior. Sr. Oduber tin contacto cu organisacionnan a traves di universidadnan y/of college na Merca. Pues, un bon reunion unda a comparti hopi idea y tur esaki ta cu vision pa mehora y engrandece baseball den su totalidad na Aruba.