ORANJESTAD – Dia 18 di October ta Dia Nacional contra Traficacion di Hende. Prome Minister Evelyn Wever-Croes a enfatisa Gobierno ta para keto riba e tema aki pa conscientisa e comunidad tocante con pa combati e fenomeno aki.
Traficacion di hende lamentablemente ta algo cu por pasa na Aruba tambe y ningun ciudadano cu ta stima su pais, kier pa esaki pasa. Debi na nos cercania na paisnan na unda tin conflicto, e riesgo pa Aruba ta hopi mas grandi. “Nos ta stima nos pais mucho hopi, y nos ta traha duro pa e pais aki bay dilanti pa laga algun hende cu kier haci e crimen aki, daña pa nos”, Prome Minister a expresa.
Tambe internacionalmente e crimen aki por haci daño na nos economia, nos turismo, y p’esey ta hopi importante pa riba un fecha asina importante, para keto na esaki. Traficacion di hende, miho conoci como sclavitud moderno, ta un violacion di derecho humano di hende y e ta responsabilidad di nos tur pa combati’e. Gobierno di Aruba, desde comienso di gobernacion, ta pone hopi atencion na e topico di contrabanda y traficacion di hende pa den e forma ey yuda combati e fenomeno aki y duna atencion y sosten na e Coordinatiecentrum Mensenhandel Mensensmokkel Aruba (CMMA) pa nan eherce nan trabou. “Tur hende den bida ta busca pa miho, pero ora bo ta engaña un hende, trece nan di otro pais pa bo por explota, abusa, y encarcela, ta contra ley y Gobierno di Aruba ta comprometi pa bringa e crimen aki”, Prome Minister a remarca.
Prome Minister a remarca cada ciudadano di nos pais por yuda combati e problematica aki. Den esaki, e campaña ‘Habri bo Wowo’ ta yuda. E campaña aki ta alerta ciudadanonan pa wak e señalnan y pa yuda combati traficacion di hende, por raporta cualkier cos cu por ta sospechoso. “Loke nos kier ta pa e dushi Aruba aki, keda dushi pa nos, pa nos yiunan y pa nan yiunan. Den e dushi Aruba aki, no tin luga pa e crimen di traficacion di hende. P’esey Gobierno di Aruba ta comprometi pa combati e crimen aki. Nos ta conta cu cada ciudadano di pais Aruba pa yuda nos den combati e crimen aki”, Prome Minister a enfatisa.
